THIIK HAI KHUD KO HAM BADALTE HAIN

Thiik hai khud ko ham badalte hain

Shukriya mashvarat ka chalte hain

Ho raha huun main kis tarah barbad

Dekhne vaale haath malte hain

Hai vo jaan ab har ek mahfil ki

Ham bhi ab ghar se kam nikalte hain

Kya takalluf karen ye kahne mei

Jo bhi khush hai ham us se jalte hain

Hai use duur ka safar dar-pesh

Ham sambhale nahin sambhalte hain

Tum bano rang tum bano khushbu

Ham to apne sukhan mei dhalte hain

Main oosi tarah to bahalta huun

Aur sab jis tarah bahalte hain

Hai ajab faisle ka sahra bhi

Chal na padiye to paanv jalte hain

TANG AGHOSH MEI ABAD KARUNGA TUJH KO

Tang aghosh mei abad karunga tujh ko

Huun bohot shaad ki nashad karunga tujh ko

Fikr-e-ijad mei gum huun mujhe ghafil na samjhe

Apne andaz par ijad karunga tujh ko

Nashsha hai raah ki duuri ka ki hamrah hai tu

Jaane kis shahr mei abad karunga tujh ko

Meri banhon mei bahakne ki saza bhi sun le

Ab bohot der mei azad karunga tujh ko

Main ki rahta huun ba-sad-naz gurezan tujh se

Tu na hoga to bohot yaad karunga tujh ko

SOCHA HAI KI AB KAR-E-MASIHA NA KARENGE

Socha hai ki ab kar-e-masiha na karenge

Vo khoon bhi thukega to parva na karenge

Is baar vo talkhi hai ki ruthe bhi nahin ham

Ab ke vo ladai hai ki jhagda na karenge

Yaan us ke saliqe ke hain asar to kya ham

Is par bhi ye kamra tah-o-bala na karenge

Ab naghma-tarazan-e-bar-afrokhta ai shahr

Vasokht kahenge ghazal insha na karenge

Aisa hai ki siine mei sulagti hain kharashen

Ab saans bhi ham lenge to achha na karenge

SIINA DAHAK RAHA HO TO KYA CHUP RAHE KOI

Siina dahak raha ho to kya chup rahe koi

Kyun chikh chikh kar na gala chhil le koi

Sabit hua sukun-e-dil-o-jan kahin nahin

Rishton mei dhundta hai to dhunda kare koi

Tark-e-taalluqat koi masala nahin

Ye to vo rasta hai ki bas chal pade koi

Divar janta tha jise main vo dhuup thi

Ab mujh ko etimad ki davat na de koi

Main khud ye chahta huun ki halat huun kharab

Mere khilaf zahr ugalta phire koi

Ai shakhs ab to mujh ko sabhi kuchh qubul hai

Ye bhi qubul hai ki tujhe chhin le koi

Haan thiik hai main apni ana ka mariz huun

Akhir meri mizaj mei kyun dakhl de koi

Ik shakhs kar raha hai abhi tak vafa ka zikr

Kaash us zaban-daraz ka muh noch le koi

SILSILA JUMBAN IK TANHA SE RUUH KISI TANHA KI THI

Silsila jumban ik tanha se ruuh kisi tanha ki thi

Ek avaz abhi aai thi vo avaz hava ki thi

Be-duniyai ne is dil ki aur bhi duniya-dar kiya

Dil par aisi tuuti duniya tark zara duniya ki thi

Apne andar hansta huun main aur bohot sharmata huun

Khoon bhi thuka sach-much thuka aur ye sab chalaki thi

Apne-ap se jab main gaya huun tab ki rivayat sunta huun

Aa kar kitne din tak us ki yaad mujhe puchha ki thi

Huun saudai saudai sa jab se main ne jaana hai

Tai vo rah-e-sar-e-saudai main ne be-sauda ki thi

Gard thi begana-gardi ki jo thi nigah meri taham

Jab bhi koi surat bichhdi ankhon mei nam-naki thi

Hai ye qissa kitna achha par main achha samjhun to 

Ek tha  koi jis ne yak-dam ye duniya paida ki thi

SHAUQ KA RANG BUJH GAYA YAAD KE ZAKHM BHAR GAE

Shauq ka rang bujh gaya yaad ke zakhm bhar gae

Kya meri fasl ho chuki kya mere din guzar gae

Rah-guzar-e-khayal mei dosh-ba-dosh the jo log

Vaqt ki gard-bad mei jaane kahan bikhar gae

Shaam hai kitni be-tapak shahr hai kitna sahm-nak

Ham-nafaso! kahan ho tum jaane ye sab kidhar gae

Pas-e-hayat ka khayal ham ko bohot bura laga

Pas ba-hujum-e-maarka jaan ke be-sipar gae

Main to safon ke darmiyan kab se pada huun nim-jan

Mere tamam jan-nisar mere liye to mar gae

SHAUQ KA BAAR UTAAR AAYA HUUN

Shauq ka baar utaar aaya huun

Aaj main us ko haar aaya huun

Uf mera aaj mai-kade aana

Yuun to main kitni baar aaya huun

Doston dost ko sambhala do

Duur se pa-figar aaya huun

Saf-e-akhir se lad raha tha main

Aur yahan lash-var aaya huun

Vahi dasht-e-azab-e-mayusi

Vahin anjam-kar aaya huun

SHARMINDAGI HAI HAM KO BOHOT HAM MILE TUMHEN

Sharmindagi hai ham ko bohot ham mile tumhen

Tum sar-ba-sar khushi the magar gham mile tumhen

Main apne aap mei na mila is ka gham nahin

Gham to ye hai ki tum bhi bohot kam mile tumhen

Hai jo hamara ek hisab us hisab se

Aati hai ham ko sharm ki paiham mile tumhen

Tum ko jahan-e-shauq-o-tamanna mei kya mila

Ham bhi mile to darham o barham mile tumhen

Ab apne taur hi mei nahin tum so kaash ki

Khud mei khud apna taur koi dam mile tumhen

Is shahr-e-hila-ju mei jo mahram mile mujhe

Fariyad jan-e-jan vahi mahram mile tumhen

Deta hun tum ko khushki-e-mizhgan ki main dua

Matlab ye hai ki daman-e-pur-nam mile tumhen

Main un mei aaj tak kabhi paaya nahin gaya

Janan jo mere shauq ke aalam mile tumhen

Tum ne hamare dil mei bohot din safar kiya

Sharminda hain ki us mei bohot kham mile tumhen

Yun ho ki aur hi koi havva mile mujhe

Ho yun ki aur ho koi aadam mile tumhen

SHAMSHIR MERI, MERI SIPAR KISKE PAAS HAI

Shamshir meri, meri sipar kis ke paas hai

Do mera khud par mera sar kis ke paas hai

Darpesh ek kaam hai himmat ka sathiyo

Kasna hai mujh ko meri kamar kis ke paas hai

Taari ho mujh pe kaun si halat mujhe batao

Mera hisab-e-naf-o-zarar kis ke paas hai

Ai ahl-e-shahr main to dua-go-e-shahr hun

Lab par mere dua hai asar kis ke paas hai

Dad-o-sitad ke shahr mei hone ko aai shaam

Khvahish hai mere paas khabar kis ke paas hai

Pur-hal huun pa surat-e-ahval kuchh nahin

Hairat hai mere paas nazar kis ke paas hai

Ik aftab hai meri jeb-e-nigah mei

Pahnai-e-numud-e-sahar kis ke paas hai

Qissa kishor ka nahin koshak ka hai ki hai

Darvaza sab ke paas hai ghar kis ke paas hai

Mehman-e-qasr hain hamen kuchh ramz chahiyen

Ye puchh ke batao khandar kis ke paas hai

Uthla sa naf-pyala hamari nahin talash

Ai ladkiyo! batao bhanvar kis ke paas hai

Nakhun badhe huwe hain mere mujh se kar hazar

Ye ja ke dekh nail-cutter kis pe paas hai

SHAAM THI AUR BARG-O-GUL SHAL THE MAGAR SABA BHI THI

Shaam thi aur barg-o-gul shal the magar saba bhi thi

Ek ajiib sukut tha ek ajab sada bhi thi

Ek malal ka sa haal mahv tha apne haal mei

Raqs-o-nava the be-taraf mahfil-e-shab bapa bhi thi

Samae-e-sada-e-jan be-sarokar tha ki tha

Ek guman ki dastan bar-lab nim-va bhi thi

Kya mah-o-sal majra ek palak thi jo miyan

Baat ki ibtida bhi thi baat ki intiha bhi thi

Ek surud-e-roshni nima-e-shab ka khvab tha

Ek khamosh tirgi saneha-ashna bhi thi

Dil tera pesh-e-gila-e-kam kharab kar gaya

Varna to ek ranj ki halat-be-gila bhi thi

Dil ke muamle jo the un mei se ek ye bhi hai

Ik havas thi dil mei jo dil se gurez-pa bhi thi

Bal-o-par-e-khayal ko ab nahin samt-o-su nasib

Pahle thi ik ajab faza aur jo pur-faza bhi thi

Khushk hai chashma-sar-e-jan zard hai sabza-zar-e-dil

Ab to ye sochiye ki yaan pahle kabhi hava bhi thi

SHAAM TAK MERI BEKALI HAI SHARAB

Shaam tak meri bekali hai sharab

Shaam ko meri sarkhushi hai sharab

Jahl-e-vaiz ka is ko raas aae

Sahibo meri agahi hai sharab

Rang-ras hai meri ragon mei ravan

Ba-khuda meri zindagi hai sharab

Naaz hai apni dilbari pe mujhe

Mera dil meri dilbari hai sharab

Hai ghanimat jo hosh mei nahin main

Shaikh tujh ko bacha rahi hai sharab

His jo hoti to jaane kya karta

Muftiyon meri be-hisi hai sharab

SHAAM HUI HAI YAAR AAE HAIN YARON KE HAMRAH CHALEN

Shaam hui hai yaar aae hain yaron ke hamrah chalen

Aaj vahan qavvali hogi 'Jaun' chalo dargah chalen

Apni galiyan apne ramne apne jangal apni hava

Chalte chalte vajd mei aaen rahon mei be-rah chalen

Jaane basti mei jangal ho ya jangal mei basti ho

Hai kaisi kuchh na-agahi aao chalo nagah chalen

Kuuch apna us shahr taraf hai naami ham jis shahr ke hain

Kapde phaden khak-ba-sar hon aur ba-izz-o-jah chalen

Raah mei us ki chalna hai to aish kara den qadmon ko

Chalte jaaen chalte jaaen yaani khatir-khvah chalen

SHAKH-E-UMMID JAL GAI HOGI

Shakh-e-ummid jal gai hogi

Dil ki halat sambhal gai hogi

'Jaun' us aan tak ba-khair huun main

Zindagi daav chal gai hogi

Ik jahannum hai mera siina bhi

Aarzu kab ki gal gai hogi

Sozish-e-partav-e-nigah na puchh

Mardumak to pighal gai hogi

Ham ne dekhe the khvab shoalon ke

Niind ankhon mei jal gai hogi

Us ne mayus kar diya hoga

Phans dil se nikal gai hogi

Ab to dil hi badal gaya ab to

Saari duniya badal gai hogi

Dil gali mei raqib dil ka julus

Vaan to talvar chal gai hogi

Ghar se jis roz main chala hunga

Dil ki dilli machal gai hogi

Dhuup yani ki zard zard ik dhuup

Laal qile se dhal gai hogi

Hijr-e-hiddat mei yaad ki khushbu

Ek pankha sa jhal gai hogi

Aai thi mauj-e-sabz-e-bad-e-shimal

Yaad ki shakh phal gai hogi

Vo dam-e-subh ghusl-khane mei

Mere pahlu se shal gai hogi

Sham-e-subh-e-firaq daaim hai

Ab tabiat bahal gai hogi

SHAHR-BA-SHAHR KA SAFAR ZAD-E-SAFAR LIYE BAGHAIR

Shahr-ba-shahr kar safar zad-e-safar liye baghair

Koi asar kiye baghair koi asar liye baghair

Koh-o-kamar mei ham-safir kuchh nahin ab ba-juz hava

Dekhiyo palatiyo na aaj shahr se par liye baghair

Vaqt ke maarke mei thiin mujh ko riayaten havas

Main sar-e-ma'arka gaya apni sipar liye baghair

Kuchh bhi ho qatl-gah mei husn-e-badan ka hai zarar

Ham na kahin se aaenge dosh pe sar liye baghair

Qarya-e-girya mei mera girya hunar-varana hai

Yaan se kahin talunga main dad-e-hunar liye baghair

Us ke bhi kuchh gile hain dil un ka hisab tum rakho

Diid ne us mei ki basar us ki khabar liye baghair

Us ka sukhan bhi ja se hai aur vo ye ki 'Jaun' tum

Shohra-e-shahr ho to kya shahr mei ghar liye baghair

SAR-E-SAHRA HABAB BECHE HAIN

Sar-e-sahra habab beche hain

Lab-e-dariya sarab beche hain

Aur to kya tha bechne ke liye

Apni ankhon ke khvab beche hain

Khud saval un labon se kar ke miyan

Khud hi un ke javab beche hain

Zulf-kuchon mei shana-kush ne tere

Kitne hi pech-o-tab beche hain

Shahr mei ham kharab halon ne

Haal apne kharab beche hain

Jaan-e-man teri be-naqabi ne

Aaj kitne naqab beche hain

Meri fariyad ne sukut ke saath

Apne lab ke azaab beche hain

SAARE RISHTE TABAH KAR AAYA

Saare rishte tabah kar aaya

Dil-e-barbad apne ghar aaya

Akhirash khoon thukne se miyan

Baat mei teri kya asar aaya

Tha khabar mei ziyan dil o jaan ka

Har taraf se main be-khabar aaya

Ab yahan hosh mei kabhi apne

Nahin aaunga main agar aaya

Main raha umr bhar juda khud se

Yaad main khud ko umr bhar aaya

Vo jo dil naam ka tha ek nafar

Aaj main is se bhi mukar aaya

Muddaton baad ghar gaya tha main

Jaate hi main vahan se dar aaya

SAR HI AB PHODIYE NADAMAT MEI

Sar hi ab phodiye nadamat mei

Niind aane lagi hai furqat mei

Hain dalilen tere khilaf magar

Sochta hun teri himayat mei

Ruuh ne ishq ka fareb diya

Jism ko jism ki adavat mei

Ab faqat adaton ki varzish hai

Ruuh shamil nahin shikayat mei

Ishq ko darmiyan na laao ki main

Chikhta hun badan ki usrat mei

Ye kuchh asan to nahin hai ki ham

Ruth'te ab bhi hain muravvat mei

Vo jo taamir hone vaali thi

Lag gai aag us imarat mei

Zindagi kis tarah basar hogi

Dil nahin lag raha mohabbat mei

Hasil-e-kun hai ye jahan-e-kharab

Yahi mumkin tha itni ujlat mei

Phir banaya khuda ne aadam ko

Apni surat pe aisi surat mei

Aur phir aadmi ne ghaur kiya

Chhipkili ki latif sanat mei

Ai khuda jo kahin nahin maujud

Kya likha hai hamari qismat mei

SAMAJH MEI ZINDAGI AAE KAHAN SE

Samajh mei zindagi aae kahan se

Padhi hai ye ibarat darmiyan se

Yahan jo hai tanaffus hi mei gum hai

Parinde ud rahe hain shakh-e-jan se

Makan-o-la-makan ke biich kya hai

Juda jis se makan hai la-makan se

Daricha baaz hai yadon ka aur main

Hava sunta hun main pedon ki zaban se

Tha ab tak ma.arka bahar ka darpesh

Abhi to ghar bhi jaana hai yahan se

Zamana tha vo dil ki zindagi ka

Teri furqat ke din laun kahan se

Fulan se thi ghazal behtar fulan ki

Fulan ke zakhm achchhe the fulan ke

SAB CHALE JAAO MUJH MEI TAAB NAHIN

Sab chale jaao mujh mei taab nahin

Naam ko bhi ab iztirab nahin

Khoon kar duun tere shabab ka main

Mujh sa qatil tera shabab nahin

Ik kitab-e-vajud hai to sahi

Shayad is mei dua ka baab nahin

Tu jo padhta hai bu-ali ki kitab

Kya ye aalim koi kitab nahin

Apni manzil nahin koi fariyad

Rakhsh bhi apna bad-rikab nahin

Ham kitabi sada ke hain lekin

Hasb-e-mansha koi kitab nahin

Bhool jaana nahin gunah oose

Yaad karna oose savab nahin

Padh liya us ki yaad ka nushka

Us mei shohrat ka koi baab nahin

RUTHA THA TUJH SE YAANI KHUD APNI KHUSHI SE MAIN

Rutha tha tujh se yaani khud apni khushi se main

Phir us ke baad jaan na rutha kisi se main

Banhon se meri vo abhi rukhsat nahin hua

Par gum huun intizar mei us ke abhi se main

Dam-bhar teri havas se nahin hai mujhe qarar

Halkan ho gaya huun teri dilkashi se main

Is taur se hua tha juda apni jaan se

Jaise bhula sakunga oose aaj hi se main

Ai tarah-dar-e-ishva-taraz-e-dayar-e-naz

Rukhsat hua huun tere liye dil-gali se main

Tu hi harim-e-jalva hai hamgam-e-rang hai

Janan bohot udaad huun apni kami se main

Kuchh to hisab chahiye aine se tujhe

Lunga tera hisab meri jaan tujhi se main