YUUN BAHAR AAI HAI IS BAAR KI JAISE QASID

Yuun bahar aai hai is baar ki jaise qasid

Kucha-e-yar se be-nail-e-maram aata hai

Har koi shahr mei phirta hai salamat-daman

Rind mai-khane se shaista-khiram aata hai

Havas-e-mutrib-o-saqi mei pareshan aksar

Abr aata hai kabhi mah-e-tamam aata hai

Shauq valon ki hazin mahfil-e-shab mei ab bhi

Amad-e-subh ki surat tera naam aata hai

Ab bhi elan-e-sahar karta hua mast koi

Dagh-e-dil kar ke farozan sar-e-sham aata hai

YE MAUSAM-E-GUL GARCHE TARAB-KHEZ BAHUT HAI

Ye mausam-e-gul garche tarab-khez bahut hai

Ahval-e-gul-o-lala gham-angez bahut hai

Khush davat-e-yaran bhi hai yalghar-e-adu bhi

Kya kijiye dil ka jo kam amez bahut hai

Yuun pir-e-mughan shekh-e-haram se hue yak-jan

Mai-khane mei kam-zarfi-e-parhez bahut hai

Ik gardan-e-makhluq jo har haal mei khaam hai

Ik bazu-e-qatil hai ki khun-rez bahut hai

Kyun mishal-e-dil 'Faiz' chuupao tah-e-daman

Bujh jaegi yuun bhi ki hava tez bahut hai

YE KIS KHALISH NE PHIR IS DIL MEI ASHIYANA KIYA

Ye kis khalish ne phir is dil mei ashiyana kiya

Phir aaj kis ne sukhan ham se ghaebana kiya

Gham-e-jahan ho rukh-e-yar ho ki dast-e-adu

Suluk jis se kiya ham ne ashiqana kiya

The khaak-e-rah bhi ham log qahr-e-tufan bhi

Saha to kya na saha aur kiya to kya na kiya

Khusha ki aaj har ik mudaai ke lab par hai

Vo raaz jis ne hamen randa-e-zamana kiya

Vo hila-gar jo vafa-ju bhi hai jafa-khu bhi

Kiya bhi 'Faiz' to kis but se dostana kiya

YE JAFA-E-GHAM KA CHARA VO NAJAT-E-DIL KA AALAM

Ye jafa-e-gham ka chara vo najat-e-dil ka aalam

Tera husn dast-e-isa teri yaad ru-e-maryam

Dil o jaan fida-e-rahe kabhi aa ke dekh hamdam

Sar-e-ku-e-dil-figaran shab-e-arzu ka aalam

Teri diid se siva hai tere shauq mei baharan

Vo chaman jahan giri hai tere gesuon ki shabnam

Ye ajab qayamaten hain tere rahguzar mei guzaran

Na hua ki mar miten ham na hua ki ji uthen ham

Lo suni gai hamari yuun phire hain din ki phir se

Vahi gosha-e-qafas hai vahi fasl-e-gul ka matam

YAK-BA-YAK SHORISH-E-FUGHAN KI TARAH

Yak-ba-yak shorish-e-fughan ki tarah

Fasl-e-gul aai imtihan ki tarah

Sehn-e-gulshan mei bahr-e-mushtaqan

Har ravish khinch gai kaman ki tarah

Phir lahu se har ek kasa-e-dagh

Pur hua jam-e-arghavan ki tarah

Yaad aaya junun-e-gum-gashta

Be-talab qarz-e-doston ki tarah

Jaane kis par ho mehrban qatil

Be-sabab marg-e-na-gahan ki tarah

Har sada par lage hain kaan yahan

Dil sambhale raho zaban ki tarah

YAD-E-GHAZAL-CHASHMAN ZIKR-E-SAMAN-AZARAN

Yad-e-ghazal-chashman zikr-e-saman-azaran

Jab chaha kar liya hai kunj-e-qafas baharon

Ankhon mei dard-mandi honton pe uzr-khvahi

Janana vaar aai sham-e-firaqyara

Namus-e-jan-o-dil ki baazi lagi thi varna

Asan na thi kuchh aisi rah-e-vafa-shi.aran

Mujrim ho khvah koi rahta hai nasehon ka

Ru-e-sukhan hamesha su-e-jigar-figaran

Hai ab bhi vaqt zahid tarmim-e-zuhd kar le

Su-e-haram chala hai amboh-e-bada-khvaran

Shayad qarib pahunchi subh-e-visal hamdam

Mauj-e-saba liye hai khush-bu-e-khush-kinaran

Hai apni kisht-e-viran sarsabz is yaqin se

aaenge is taraf bhi ik roz abr-o-baran

Aaegi 'Faiz' ik din bad-e-bahar le kar

Taslim-e-mai-faroshan paigham-e-mai-gusaran

YAAD KA PHIR KOI DARVAZA KHULA AKHIR-E-SHAB

Yaad ka phir koi darvaza khula akhir-e-shab

Dil mei bikhri koi khushbu-e-qaba akhir-e-shab

Subh phuti to vo pahlu se utha akhir-e-shab

Vo jo ik umr se aaya na gaya akhir-e-shab

Chaand se maand sitaron ne kaha akhir-e-shab

Kaun karta hai vafa ahd-e-vafa akhir-e-shab

Lams-e-janana liye masti-e-paimana liye

Hamd-e-bari ko uthe dast-e-dua akhir-e-shab

Ghar jo viran tha sar-e-sham vo kaise kaise

Fursat-e-yar ne abad kiya akhir-e-shab

Jis ada se koi aaya tha kabhi avval-e-shab

Usi andaz se chal bad-e-saba akhir-e-shab

VO BUTON NE DAALE HAIN VASVASE KI DILON SE KHAUF-E-KHUDA GAYA

Vo buton ne daale hain vasvase ki dilon se khauf-e-khuda gaya

Vo padi hain roz qayamaten ki khayal-e-roz-e-jaza gaya

Jo nafas tha khar-e-gulu bana jo uthe the haath lahu hue

Vo nashat-e-ah-e-sahr gai vo vaqar-e-dast-e-dua gaya

Na vo rang fasl-e-bahar ka na ravish vo abr-e-bahar ki

Jis ada se yaar the ashna vo mizaj-e-bad-e-saba gaya

Jo talab pe ahd-e-vafa kiya to vo abru-e-vafa gai

Sar-e-am jab hue muddai to savab-e-sidq-o-safa gaya

Abhi badban ko tah rakho abhi muztarib hai rukh-e-hava

Kisi raste mei hai muntazir vo sukun jo aa ke chala gaya

VO AHD-E-GHAM KI KAHISH-HA-E-BE-HASIL KO KYA SAMJHE

Vo ahd-e-gham ki kahish-ha-e-be-hasil ko kya samjhe

Jo un ki mukhtasar rudad bhi sabr-azma samjhe

Yahan vabastagi vaan barhami kya janiye kyun hai

Na ham apni nazar samjhe na ham un ki ada samjhe

Fareb-e-arzu ki sahl-angari nahin jaati

Ham apne dil ki dhadkan ko teri avaz-e-pa samjhe

Tumhari har nazar se munsalik hai rishta-e-hasti

Magar ye duur ki baten koi nadan kya samjhe

Na puchho ahd-e-ulfat ki bas ik khvab-e-pareshaan tha

Na dil ko raah par laae na dil ka muddaa samjhe

VAHIN HAIN DIL KE QARAIN TAMAM KAHTE HAIN

Vahin hain dil ke qarain tamam kahte hain

Vo ik khalish ki jise tera naam kahte hain

Tum aa rahe ho ki bajti hain meri zanjiren

Na jaane kya mere divar-o-bam kahte hain

Yahi kanar-e-falak ka siyah-tarin gosha

Yahi hai matla-e-mah-e-tamam kahte hain

Piyo ki muft laga di hai khun-e-dil ki kashid

Giran hai ab ke mai-e-lala-fam kahte hain

Faqih-e-shahr se mai ka javaz kya puchhen

Ki chandni ko bhi hazrat haram kahte hain

Nava-e-murgh ko kahte hain ab ziyan-e-chaman

Khile na phool ise intizam kahte hain

Kaho to ham bhi chalen 'Faiz' ab nahin sar-e-dar

Vo farq-e-martaba-e-khas-o-am kahte hain

VAFA-E-VADA NAHIN VADA-E-DIGAR BHI NAHIN

Vafa-e-vada nahin vada-e-digar bhi nahin

Vo mujh se ruthe to the lekin is qadar bhi nahin

Baras rahi hai harim-e-havas mei daulat-e-husn

Gada-e-ishq ke kaase mei ik nazar bhi nahin

Na jaane kis liye ummid-var baitha huun

Ik aisi raah pe jo teri rahguzar bhi nahin

Nigah-e-shauq sar-e-bazm be-hijab na ho

Vo be-khabar hi sahi itne be-khabar bhi nahin

Ye ahd-e-tark-e-mohabbat hai kis liye akhir

Sukun-e-qalb udhar bhi nahin idhar bhi nahin

TUMHARI YAAD KE AJAB ZAKHM BHARNE LAGTE HAIN

Tumhari yaad ke jab zakhm bharne lagte hain

Kisi bahane tumhen yaad karne lagte hain

Hadis-e-yar ke unvan nikharne lagte hain

To har harim mei gesu sanvarne lagte hain

Har ajnabi hamen mahram dikhai deta hai

Jo ab bhi teri gali se guzarne lagte hain

Saba se karte hain ghurbat-nasib zikr-e-vatan

To chashm-e-subh mei aansu ubharne lagte hain

Vo jab bhi karte hain is nutq o lab ki bakhiya-gari

Faza mei aur bhi naghme bikharne lagte hain

Dar-e-qafas pe andhere ki mohr lagti hai

To 'Faiz' dil mei sitare utarne lagte hain

TUM AAE HO NA SHAB-E-INTIZAAR GUZRI HAI

Tum aae ho na shab-e-intizaar guzri hai

Talash mei hai sahar baar baar guzri hai

Junun mei jitni bhi guzri ba-kar guzri hai

Agarche dil pe kharabi hazar guzri hai

Hui hai hazrat-e-naseh se guftugu jis shab

Vo shab zarur sar-e-ku-e-yar guzri hai

Vo baat saare fasane mei jis ka zikr na tha

Vo baat un ko bahut na-gavar guzri hai

Na gul khile hain na un se mile na mai pi hai

Ajiib rang mei ab ke bahar guzri hai

Chaman pe gharat-e-gul-chin se jaane kya guzri

Qafas se aaj saba be-qarar guzri hai

TUJHE PUKARA HAI BE-IRADA

Tujhe pukara hai be-irada

Jo dil dukha hai bohot ziyada

Nadim ho tera hard-e-shirin

To rang par aae rang-e-bada

Ata karo ik ada-e-dairin

To ashk se tar karen libada

Na jaane kis din se muntazir hai

Dil-e-sar-e-rah-guzar fitada

Ki ek din phir nazar mei aae

Vo bam-e-raushan vo dar dushada

Vo aae pursish ko phir sajae

Qaba-e-rangin ada-e-sada

TERI UMMID TERA INTIZAR JAB SE HAI

Teri umiid tera intizar jab se hai

Na shab ko din se shikayat na din ko shab se hai

Kisi ka dard ho karte hain tere naam raqam

Gila hai jo bhi kisi se tere sabab se hai

Hua hai jab se dil-e-na-subur be-qabu

Kalam tujh se nazar ko bade adab se hai

Agar sharar hai to bhadke jo phool hai to khile

Tarah tarah ki talab tere rang-e-lab se hai

Kahan gae shab-e-furqat ke jagne vaale

Sitara-e-sahari ham-kalam kab se hai

TERI SURAT JO DIL-NASHIN KI HAI

Teri surat jo dil-nashin ki hai

Ashna shakl har hasin ki hai

Husn se dil laga ke hasti ki

Har ghadi ham ne atishin ki hai

Subh-e-gul ho ki sham-e-mai-khana

Madh us ru-e-naznin ki hai

Shaikh se be-hiras milte hain

Ham ne tauba abhi nahin ki hai

Zikr-e-dozakh bayan-e-hur o qusur

Baat goya yahin kahin ki hai

Ashk to kuchh bhi rang la na sake

Khoon se tar aaj astin ki hai

Kaise manen haram ke sahl-pasand

Rasm jo ashiqon ke diin ki hai

'Faiz' auj-e-khayal se ham ne 

Asman sindh ki zamin ki hai

TERE GHAM KO JAAN KI TALASH THI

Tere gham ko jaan ki talash thi tere jan-nisar chale gae

Teri rah mei karte the sar talab sar-e-rahguzar chale gae

Teri kaj-adai se haar ke shab-e-intizar chali gai

Mere zabt-e-hal se ruuth kar mere gham-e-gusar chale gae

Na saval-e-vasl na arz-e-gham na hikayaten na shikayaten

Tere ahd mei dil-e-zar ke sabhi ikhtiyar chale gae

Ye haim the jin ke libas par sar-e-rah siyahi likhi gai

Yahi daagh the jo saja ke ham sar-e-bazm-e-yar chale gae

Na rha junun-e-rukh-e-vafa ye rasan ye daar karoge kya

Jinhen jurm-e-ishq pe naaz tha vo gunahgar chale gae

SUBH KI AAJ JO RANGAT HAI VO PAHLE TO NA THI

Subh ki aaj jo rangat hai vo pahle to na thi

Kya khabar aaj khiraman sar-e-gulzar hai kaun

Shaam gulnar hui jaati hai dekho to sahi

Ye jo nikla hai liye mishal-e-rukhsar hai kaun

Raat mahki hui aai hai kahin se puchho

Aaj bikhrae hue zulf-e-trah-dar hai kaun

Phir dar-e-dil pe koi dene laga hai dastak

Janiye phir dil-e-vahshi ka talabgar hai kaun

SITAM SIKHLAEGA RASM-E-VAFA AISE NAHIN HOTA

Sitam sikhlaega rasm-e-vafa aise nahin hota

Sanam dikhlaenge rah-e-khuda aise nahin hota

Gino sab hasraten jo khoon hui hain tan ke maqtal mei

Mere qatil hisab-e-khoon-baha aise nahin hota

Jahan-e-dil mei kaam aati hain tadbiren na taaziren

Yahan paiman-e-taslim-o-raza aise nahin hota

Har ik shab har ghadi guzre qayamat yun to hota hai

Magar har subh ho roz-e-jaza aise nahin hota

Ravan hai nabz-e-dauran gardishon mei asman saare

Jo tum kahte ho sab kuchh ho chuka aise nahin hota

SITAM KI RASMEN BOHOT THIIN LEKIN NA THI TERI ANJUMAN SE PAHLE

Sitam ki rasmen bohot thiin lekin na thi teri anjuman se pahle

Saza khata-e-nazar se pahle itaab jurm-e-sukhan se pahle

Jo chal sako to chalo ki rah-e-vafa bohot mukhtasar hui hai

Maqam hai ab koi na manzil faraz-e-dar-e-rasan se pahle

Nahin rahi ab junun ki zanjir par vo pahli ijara-dari

Giraft karte hain karne vaale khirad pe divana-pan se pahle

Kare koi tegh ka nazara ab un ko ye bhi nahin gavara

Ba-zid hai qatil ki jan-e-bismil figar ho jism o tan se pahle

Ghurur-e-sarv-o-saman se kah do ki phir vahi tajdar honge

Jo khar-o-khas vali-e-chaman the uruj-e-sarv-o-suman se pahle

Idhar taqaze hain maslahat ke udhar taqaza-e-dard-e-dil hai

Zaban sambhalen ki dil sambhalen asiir zikr-e-vatan se pahle