Tang aghosh mei abad karunga tujh ko
Huun bohot shaad ki nashad karunga tujh ko
Fikr-e-ijad mei gum huun mujhe ghafil na samjhe
Apne andaz par ijad karunga tujh ko
Nashsha hai raah ki duuri ka ki hamrah hai tu
Jaane kis shahr mei abad karunga tujh ko
Meri banhon mei bahakne ki saza bhi sun le
Ab bohot der mei azad karunga tujh ko
Main ki rahta huun ba-sad-naz gurezan tujh se
Tu na hoga to bohot yaad karunga tujh ko
No comments
Post a Comment