TASKIN KO HAM NA ROEN JO ZAUQ-E-NAZAR MILE

Taskin ko ham na roen jo zauq-e-nazar mile

Huran-e-khuld mei teri surat magar mile

Apni gali mei mujh ko na kar dafn ba-e-qatl

Mere pate se khalq ko kyun tera ghar mile

Saqi-gari ki sharm karo aaj varna ham

Har shab piya hi karte hain mai jis qadar mile

Tujh se to kuchh kalam nahin lekin ai nadim

Mera salam kahiyo agar nama-bar mile

Tum ko bhi ham dikhaen ki majnun ne kya kiya

Fursat kashkash-e-gham-e-pinhan se gar mile

Lazim nahin ki khizr ki ham pairvi karen

Jaana ki ik buzurg hamen ham-safar mile

Ai sakinan-e-kucha-e-dildar dekhna

Tum ko kahin jo 'Ghalib'-e-ashufta-sar mile

TAPISH SE MERI VAQF-E-KASHMAKASH HAR TAR-E-BISTAR HAI

Tapish se meri vaqf-e-kashmakash har tar-e-bistar hai

Mera sar ranj-e-balin hai mera tan bar-e-bistar hai

Sarishk-e-sar ba-sahra daada nur-ul-ain-e-bistar hai

Dil-e-be-dast-o-pa uftada bar-khurdar-e-bistar hai

Khusha iqbal-e-ranjuri ayadat ko tum aae ho

Farogh-e-sham-e-balin tala-e-bedar-e-bistar hai

Ba-tufan-gah-e-josh-e-iztirab-e-sham-e-tanhai

Shua-e-aftab-e-subh-e-mahshar tar-e-bistar hai

Abhi aati hai bu balish se us ki zulf-e-mushkin ki

Hamari diid ko khvab-e-zulekha ar-e-bistar hai

Kahun kya dil ki kya halat hai hijr-e-yar mei 'Ghalib'

Ki betabi se har-yak tar-e-bistar khar-e-bistar hai

TAGHAFUL-DOST HUN MERA DIMAGH-E-AJZ AALI HAI

Taghaful-dost hun mera dimagh-e-ajz aali hai

Agar pahlu-tahi kiije to ja meri bhi khali hai

Raha abad aalam ahl-e-himmat ke na hone se

Bhare hain jis qadar jam-o-subu mai-khana khali hai

TA HAM KO SHIKAYAT KI BHI BAAQI NA RAHE JA

Ta ham ko shikayat ki bhi baaqi na rahe ja

Sun lete hain go zikr hamara nahin karte

'Ghalib' tera ahval suna denge ham un ko

Vo sun ke bula len ye ijara nahin karte

SURMA-E-MUFT-E-NAZAR HUN MERI QIMAT YE HAI

Surma-e-muft-e-nazar hun meri qimat ye hai

Ki rahe chashm-e-kharidar pe ehsan mera

Rukhsat-e-nala mujhe de ki mabada zalim

Tere chehre se ho zahir gham-e-pinhan mera

Khalvat-e-abila-e-pa mei hai jaulan mera

Khoon hai dil tangi-e-vahshat se bayaban mera

Hasrat-e-nashsha-e-vahshat na ba-sai-e-dil hai

Arz-e-khamiyaza-e-majnun hai gareban mera

Fahm zanjiri-e-be-rabti-e-dil hai ya-rab

Kis zaban mei hai laqab khvab-e-pareshan mera

SIYAHI JAISE GIR JAAE DAM-E-TAHRIR KAGHAZ PAR

Siyahi jaise gir jaae dam-e-tahrir kaghaz par

Meri qismat mei yun tasvir hai shab-ha-e-hijran ki

Kahun kya garm-joshi main-kashi mei shoala-ruyan ki

Ki sham-e-khana-e-dil atish-e-mai se farozan ki

Hamesha mujh ko tifli mei bhi mashq-e-terah-rozi thi

Siyahi hai mere ayyam mei lauh-e-dabistan ki

Daregh! ah-e-sahar-gah kar-e-bad-e-subh karti hai

Ki hoti hai ziyada sard-mehri shama-ruyan ki

Mujhe apne juunun ki be-takalluf parda-dari thi

Va-lekin kya karun aave jo rusvai gareban ki

Hunar paida kiya hai main ne hairat-azmai mei

Ki jauhar aaine ka har palak hai chashm-e-hairan ki

Khudaya kis qadar ahl-e-nazar ne khaak chhani hai

Ki hain sad-rakhna juun ghirbal divaren gulistan ki

Huwa sharm-e-tahi-dasti se se vo bhi sar-nigun akhir

Bas-ai zakhm-e-jigar ab dekh le shorish namak-dan ki

Bayad-e-garmi-e-sohbat ba-rang-e-shoala dahke hai

Chhupaun kyuki 'Ghalib' sozishen dagh-e-numayan ki

Junun tohmat-kash-e-taskin na ho gar shadmani ki

Namak-pash-e-kharash-e-dil hai lazzat zindagani ki

Kashkash-ha-e-hasti se kare kya sai-e-azadi

Hui zanjir-e-mauj-e-ab ko fursat ravani ki

Na khinch ai sai-e-dast-na-rasa zulf-e-tamanna ko

Pareshan-tar hai mu-e-khama se tadbir maani ki

Kahan ham bhi rag-o-pai rakhte hain insaf bahattar hai

Na khinche taqat-e-khamyaza tohmat na-tavani ki

Takalluf-bartaraf farhad aur itni subukdasti

Khayal asan tha lekin khvab-e-khusrav ne girani ki

Par-az-murdan bhi divana ziyarat-gah-e-tiflan hai

Sharar-e-sang ne turbat pe meri gul-fishani ki

'Asad' ko boriye mei dhar ke phunka mauj-e-hasti ne 

Faqiri mei bhi baaqi hai shararat naujavani ki

SITAM-KASH MASLAHAT SE HUUN KI KHUBAN TUJH PE ASHIQ HAIN

Sitam-kash maslahat se huun ki khuban tujh pe ashiq hain

Takalluf bartaraf mil jaega tujh sa raqib akhir

SIMAB-PUSHT GARMI-E-AAINA DE HAI HAM

Simab-pusht garmi-e-aaina de hai ham

Hairan kiye huwe hain dil-e-be-qarar ke

Aghosh-e-gul kushuda bara-e-vida hai

Ai andalib chal ki chale din bahar ke

Yun bad-e-zabt-e-ashk phirun gird yaar ke

Paani piye kisu pe koi jaise vaar ke

Bad-az-vida-e-yar ba-khoon dar tapida hain

Naqsh-e-qadam hain ham kaf-e-pa-e-nigar ke

Ham mashq-e-fikr-e-vasl-o-gham-e-hijr se 'Asad'

Laaiq nahin rahe hain gham-e-rozgar ke

SHIKVE KE NAAM SE BE-MEHR KHAFA HOTA HAI

Shikve ke naam se be-mehr khafa hota hai

Ye bhi mat kah ki jo kahiye to gila hota hai

Pur hun main shikve se yun raag se jaise baaja

Ik zara chhediye phir dekhiye kya hota hai

Go samajhta nahin par husn-e-talafi dekho

Shikva-e-jaur se sargarm-e-jafa hota hai

Ishq ki raah mei hai charkh-e-makaukab ki vo chaal

Sust-rau jaise koi abla-pa hota hai

Kyun na thahren hadaf-e-navak-e-bedad ki ham

Aap utha laate hain gar teer khata hota hai

Khuub tha pahle se hota jo ham apne bad-khvah

Ki bhala chahte hain aur bura hota hai

Naala jaata tha pare arsh se mera aur ab

Lab tak aata hai jo aisa hi rasa hota hai

Khama mera ki vo hai bar-bud-e-bazm-e-sukhan

Shaah ki madh mei yun naghma-sara hota hai

Ai shahansha-e-kavakib sipah-o-mehr-e-alam

Tere ikram ka haq kis se ada hota hai

Saath aqlim ka hasil jo faraham kiije

To vo lashkar ka tere nal-e-baha hota hai

Har mahine mei jo ye badar se hota hai hilal

Astan par tere mah nasiya sa hota hai

Main jo gustakh hun aai-e-ghazal-khvani mei

Ye bhi tera hi karam zauq-faza hota hai

Rakhiyo 'Ghalib' mujhe is talkh-navai mei muaaf

Aaj kuchh dard mere dil mei siva hota hai

SHAUQ HAR RANG RAQIB-E-SAR-O-SAMAN NIKLA

Shauq har rang raqib-e-sar-o-saman nikla

Qais tasvir ke parde mei bhi uryan nikla

Zakhm ne daad na di tangi-e-dil ki ya rab

Teer bhi sina-e-bismit se par-afshan nikla

Bu-e-gul nala-e-dil dud-e-charagh-e-mahfil

Jo teri bazm se nikla so pareshan nikla

Dil-e-hasrat-zada tha maida-e-lazzat-e-dard

Kaam yaron ka ba-qadr-e-lab-o-dandon nikla

Thi nau-amuz-e-fana himmat-e-dushvar-pasand

Sakht mushkil hai ki ye kaam bhi asan nikla

Dil mei phir girye ne ik shor uthaya 'Ghalib'

Aah jo qatra na nikla tha so tufan nikla

Kar-khane se junun ke bhi main uryan nikla

Meri qismat ka na ek-adh gareban nikla

Saghar-e-jalva-e-sarshar hai har zarra-e-khak

Shauq-e-didar bala aaina-saman nikla

Kuchh khatakta tha mere siine mei lekin akhir

Jis ko dil kahte the so teer ka paikan nikla

Kis qadar khaak huwa hai dil-e-majnun ya rab

Naqsh-e-har-zarra suvaida-e-bayanban nikla

Shor-e-rusvai-e-dil dekh ki yak-nala-e-shauq

Laakh parde mei chhupa par vahi uryan nikla

Shokhi-e-rang-e-hina khoon-e-vafa se kab tak

Akhir ai ahd-shikan tu bhi pasheman nikla

Jauhar-ijad-e-khat-e-sabz hai khud-bini-e-husn

Jo na dekha tha so aaine mei pinhan nikla

Main bhi mazur-e-junun hun 'Asad' ai khana-kharab

Peshva lene mujhe ghar se bayaban nikla

SHABNAM BA-GUL-E-LALA NA KHALI Z-ADA HAI

Shabnam ba-gul-e-lala na khali z-ada hai

Dagh-e-dil-e-bedard nazar-gah-e-haya hai

Dil khoon-shuda-e-kashmakash-e-hasrat-e-didar

Aaina ba-dast-e-but-e-bad-mast hina hai

Shole se na hoti havas-e-shola ne jo ki

Ji kis qadar afsurdagi-e-dil pe jala hai

Timsal mei teri hai vo shokhi ki ba-sad-zauq

Aaina ba-andaz-e-gul aghosh-kusha hai

Qumri kaf-e-khakistar o bulbul qafas-e-rang'

Ai naala nishan-e-jigar-e-sokhta kya hai

Khu ne teri afsurda kiya vahshat-e-gil ko

Mashuqi o be-hauslagi tarfa bala hai

Majburi o dava-e-giraftari-e-ulfat

Dast-e-tah-e-sang-amda paiman-e-vafa hai

Malum huwa hal-e-shahidan-e-guzashta

Tegh-e-sitam aaina-e-tasvir-numa hai

Ai partav-e-khurshid-e-jahan-tab idhar bhi

Saae ki tarah ham pe ajab vaqt pada hai

Na-karda gunahon ki bhi hasrat ki mile daad

Ya rab agar in karda gunahon ki saza hai

Beganagi-e-khalq se be-dil na ho 'Ghalib'

Koi nahin tera to meri jaan khuda hai

SHAB KI VO MAJLIS-FAROZ-E-KHALVAT-E-NAMUS THA

Shab ki vo majlis-faroz-e-khalvat-e-namus tha

Rishta-e-har-shama khar-e-kisvat-e-fanus tha

Mashhad-e-ishq se koson tak jo ugti hai hina

Kis qadar ya-rab halak-e-hasrat-e-pa-bos tha

Hasil-e-ulfat na dekha juz-shikast-e-arzu

Dil-ba-dil paivasta goya yak lab-e-afsos tha

Kya kahun bimari-e-gham ki faraghat ka bayan

Jo ki khaya khoon-e-dil be-minnat-e-kaimus tha

SHAB KI BARQ-E-SOZ-E-DIL SE ZAHRA-E-ABR AAB THA

Shab ki barq-e-soz-e-dil se zahra-e-abr aab tha

Shoala-e-javvala har yak halqa-e-girdab tha

Vaan karam ko uzr-e-barish tha inan-gir-e-khiram

Girye se yaan pumba-e-balish kaf-e-sailab tha

Vaan khud-arai ko tha moti pirone ka khayal

Yaan hujum-e-ashk mei tar-e-nigah nayab tha

Jalva-e-gul ne kiya tha vaan charaghn aabju

Yaan ravan mizhgan-e-chashm-e-tar se khoon-e-nab tha

Yaan sar-e-pur-shor be-khvabi se tha divar-ju

Vaan vo farq-e-naz mahv-e-balish-e-kim-khvab tha

Yaan nafas karta tha raushan sham-e-bazm-e-be-khudi

Jalva-e-gul vaan bisat-e-sohbat-e-ahbab tha

Farsh se ta arsh vaan tufan tha mauj-e-rang ka

Yaan zamin se asman tak sokhtan ka baab tha

Na-gahan is rang se khunaba tapkane laga

Dil ki zauq-e-kavish-e-nakhun se lazzat-yab tha

SHAB KHUMAR-E-SHAUQ-E-SAQI RUSTAKHEZ-ANDAZA THA

Shab khumar-e-shauq-e-saqi rustakhez-andaza tha

Ta-muhit-e-bada surat khana-e-khamyaza tha

Yak qadam vahshat se dars-e-daftar-e-imkan khula

Jaada ajza-e-do-alam dasht ka shiraza tha

Mana-e-vahshatkhirami-ha-e-laila kaun hai

Khana-e-majnun-e-sahra-gard be-darvaza tha

Puchh mat rusvai-e-andaz-e-istighna-e-husn

Dast marhun-e-hina rukhsar rahn-e-ghaza tha

Nala-e-dil ne diye auraq-e-lakht-e-dil ba-bad

Yad-gar-e-nala ik divan-e-be-shiraza tha

Hun charaghan-e-havas juun kaghaz-e-atish-zada

Daagh garm-e-koshish-e-ijaad-e-dagh-e-taza tha

Be-navai tar sada-e-naghma-e-shohrat 'Asad'

Boriya yak nistan-alam buland avaza tha

SATAISH-GAR HAI ZAHID IS QADAR JIS BAGH-E-RIZVAN KA

Sataish-gar hai zahid is qadar jis bagh-e-rizvan ka

Vo ik guldasta hai ham be-khudon ke taq-e-nisyan ka

Bayan kya kijiye be-dad-e-kavish-ha-e-mizhgan ka

Ki har yak qatra-e-khoon daana hai tasbih-e-marjan ka

Na aai satvat-e-qatil bhi maane mere nalon ko

Liya danton mei jo tinka huwa resha nistan ka

Dikhaunga tamasha di agar fursat zamane ne

Mera har dagh-e-dil ik tukhm hai sarv-e-charaghan ka

Kiya aaina-khane ka vo naqsha ter jalve ne

kare jo partav-e-khurshid aalam shabnamistan ka

Meri taamir mei muzmar hai ik surat kharabi ki

Hayula barq-e-khirman ka hai khoon-e-garm dahqan ka

Uga hai ghar mei har su sabza-virani tamasha kar

Madaar ab khodne par ghaas ke hai mere darban ka

Khamoshi mei nihan khoon-gashta lakhon arzuen hain

Charagh-e-murda hun main be-zaban gor-e-ghariban ka

Hanuz ik partav-e-naqsh-e-khayal-e-yar baaqi hai

Dil-e-afsurda goya hujra hai yusuf ke zindan ka

Baghal mei ghair ki aaj aap sote hain kain varna

Sabab kya khvab mei aa kar tabassum-ha-e-pinhan ka

Nahin maalum kis kis ka lahun paani huwa hoga

Qayamat hai sarishk-aluda hona teri mizhgan ka

Nazar mei hai hamari jada-e-rah-e-fana 'Ghalib'

Ki ye shiraza hai aalam ke ajza-e-pareshan ka

SAR-GASHTAGI MEI ALAM-E-HASTI SE YAAS HAI

Sar-gashtagi mei alam-e-hasti se yaas hai

Taskin ko de naved ki marne ki aas hai

Leta nahin mere dil-e-avara ki khabar

Ab tak vo janta hai ki mere hi paas hai

Kijiye bayan surur-e-tap-e-gham kahan talak

Har mu mere badan pe zaban-e-sipas hai

Hai vo ghurur-e-husn se begana-e-vafa

Har-chand us ke paas dil-e-haq-shanas hai

Pi jis qadar mile shab-e-mahtab mei sharab

Is balghami-mizaj ko garmi hi raas hai

Har ik makam ko hai makin se sharaf 'Asad'

Majnun jo mar gaya hai to jangal udaas hai

Kya gham hai us ko jis ka 'Ali' sa imaam ho

Itna bhi ai falak-zada kyun ba-havas hai

SARAPA REHN-E-ISHQ-O-NA-GUZIR-E-ULFAT-E-HASTI

Sarapa rehn-e-ishq-o-na-guzir-e-ulfat-e-hasti

Ibadat barq ki karta hun aur afsos hasil ka

Ba-qadr-e-zarf hai saaqi khumar-e-tishna-kami bhi

Jo tu dariya-e-mai hai to main khamyaza hun sahil ka

Zi-bas khoon-gashta-e-rashk-e-vafa tha vahm bismil ka

Churaya zakhm-ha-e-dil ne paani tegh-e-qatil ka

Nigah-e-chashm-e-hasid vaam le ai zauq-e-khud-bini

Tamashai hun vahdat-khana-e-aaina-e-dil ka

Sharar-fursat nigah saman-e-yak-alam charaghan hai

Ba-qadr-e-rang yaan gardish mei hai paimana mahfil ka

Sarasar takhtan ko shash-jihat yak-arsa jaulan tha

Huwa vamandgi se rah-ravan ki farq manzil ka

Mujhe rah-e-sukhan mei khauf-e-gum-rahi nahin 'Ghalib'

Asa-e-khizr-e-sahra-e-sukhan hai khama be-dil ka

SAFA-E-HAIRAT-E-AAINA HAI SAMAN-E-ZANG AKHIR

Safa-e-hairat-e-aaina hai saman-e-zang akhir

Taghayyur ab-e-bar-ja-manda ka paata hai rang akhir

Na ki saman-e-aish-o-jah ne tadbir vahshat ki

Huwa jam-e-zumurrad bhi mujhe dagh-e-palang akhir

Khat-e-nau-khez nil-e-chashm zakhm-e-safi-e-ariz

Liya aina ne hirz-e-par-e-tuti ba-chang akhir

Hilal-asa tahi rah gar kushadan-ha-e-dil chahe

Huwa mah kasrat-e-sarmaya-andozi se tang akhir

Tadap kar mar gaya vo said-e-bal-afshan ki muztar tha

Huwa nasu-e-chashm-e-taaziyat chashm-e-khadang akhir

Likhi yaron ki bad-masti ne maikhane ki pamali

Hui qatra-fishani-ha-e-mai-baran-e-sang akhir

'Asad' parde mei bhi ahang-e-shauq-e-yar qaaem hai

Nahin hai naghme se khali khamidan-ha-e-chang akhir

SADGI PAR US KI MAR JAANE KI HASRAT DIL MEI HAI

Sadgi par us ki mar jaane ki hasrat dil mei hai

Bas nahin chalta ki phir khanjar kaf-e-qatil mei hai

Dekhna taqrir ki lazzat ki jo us ne kaha

Main ne ye jaana ki goya ye bhi mere dil mei hai

Garche hai kis kis burai se vale bain-hama

Zikr mera mujh se behtar hai ki us mahfil mei hai

Bas hujum-e-na-ummeedi khaak mei mil jaegi

Ye jo ik lazzat hamari sai-e-be-hasil mei hai

Ranj-e-rah kyun khinche vamandagi ko ishq hai

Uth nahin sakta hamara jo qadam manzil mei hai

Jalva zar-e-atish-e-dozakh hamara dil sahi

Fitna-e-shor-e-qayamat kis ke ab-o-gil mei hai

Hai dil-e-shorida-e-'Ghalib' tilism-e-pech-o-tab

Rahm kar apni tamanna par ki kis mushkil mei hai

SAD JALVA RU-BA-RU JO MIZHGAN UTHAIYE

Sad jalva ru-ba-ru jo mizhgan uthaiye

Taqat khana ki diid ka ehsan uthaiye

Hai sang par barat-e-maash-e-junun-e-ishq

Yaani hunuz minnat-e-tiflan uthaiye

Divar bar-e-minnat-e-mazdur se hai kham

Ai khanuman-kharab na ehsan uthaiye

Ya mere zakhm-e-rashk ko rusva na kijiye

Ya parda-e-tabassum-e-pinhan uthaiye

Hasti fareb-nama=e=mauj-e-sarab hai

Yak umr naz-e-shokhi-e-unvan uthaiye