JAB TAK DAHAN-E-ZAKHM NA PAIDA KARE KOI

Jab tak dahan-e-zakhm na paida kare koi

Mushkil ki tujh se rah-e-sukhan va kare koi

Aalam ghubar-e-vahshat-e-majnun hai sar-ba-sar

Kab tak khayal-e-turra-e-laila kare koi

Afsurdagi nahin tarab-insha-e-iltifat

Haan dard ban ke dil mei magar ja kare koi

Rone se aai nadim malamat na kar mujhe

Akhir kabhi to uqda-e-dil va kare koi

Chak-e-jigar se jab rah-e-purshish na va hui

Kya faeda ki jaib ko rusva kare koi

Lakht-e-jigar se hai rag-e-har-khar shakh-e-gul

Ta chand bagh-bani-e-sahra kare koi

Nakami-e-nigah hai barq-e-nazara-soz

Tu wo nahin ki tujh ko tamasha kare koi

Har sang o khisht hai sadaf-e-gauhar-e-shikast

Nuqsan nahin junun se jo sauda kare koi

Sar bar hui na vada-e-sabr-azma se umr

Fursat kahan ki teri tamanna kare koi

Hai vahshat-e-tabiat-e-ijaad yas-khez

Ye dard wo nahin ki na paida kare koi

Bekari-e-junun ko hai pitne ka shughl

Jab haath tut jaaen to phir kya kare koi

Husn-e-farogh-e-shamma-e-sukhan dur hai 'Asad'

Pahle dil-e-gudakhta paida kare koi

Vahshat kahan ki be-khudi insha kare koi

Hasti ko lafz-e-mani-e-anqa kare koi

Jo kuchh hai mahv-e-shokhi-e-abru-e-yar hai

Ankhon ko rakh ke taaq pe dekha kare koi

Arz-e-sarishk par hai faza-e-zamana tang

Sahra kahan ki davat-e-dariya kare koi

Wo shokh apne husn pe maghrur hai 'Asad'

Dikhla ke us ko aaina toda kare koi