GUL-O-BULBUL BAHAR MEI DEKHA

Gul-o-bulbul bahar mei dekha

Ek tujh ko hazar mei dekha

Jal gaya dil safed hain aankhen

ye to kuchh intizar mei dekha

Jaisa muztar tha zindagi mei dil

Wahin main ne qarar mei dekha

Aable ka bhi hona daman-gir

Tere kuche ke khaar mei dekha

Tiira aalam hua ye roz-e-siyah

Apne dil ke ghubar mei dekha

Zabh kar main kaha tha marta huun

Dam nahin mujh shikar mei dekha

Jin balaon ko 'Meer' sunte the

Un ko is rozgar mei dekha

GUL SHARM SE BAH JAEGA GULSHAN MEI HO KAR AAB SE

Gul sharm se bah jaega gulshan mei ho kar aab sa

Burqe se gar nikla kahin chehra tira mahtab sa

Gul-e-barg ka ye rang hai marjan ka aisa dhang hai

Dekho na jhumke hai pada vo hont laal-e-nab sa

Vo maya-e-jan to khain paida nahin jon kimiya

Main shauq ki ifrat se betab huun simab sa

Dil taab hi laaya na tuk ta yaad rahta ham-nashin

Ab aish roz-e-vasl ka hai ji mei bhula khvab sa

Sannahate mei jaan ke hosh-o-havas-o-dam na tha

Asbab saara le gaya aaya tha ik sailab sa

Ham sar-kashi se muddaton masjid se bach bach kar chale

Ab sajde hi mei guzre hai qad jo hua mehrab sa

Thi ishq ki vo ibtida jo mauj si uthhi kabhu

Ab dida-e-tar ko jo tum dekho to hai girdab sa

Bahke jo ham mast aa gae baar masjid se utha

Vaaiz ko maare khauf ke kal lag gaya jullab sa

Rakh haath dil par 'Meer' ke daryaft kar kya haal hai

Rahta hai aksar ye javan kuchh in dinon betab sa

GUL KO MAHBUB HAM-QAYAS KIYA

Gul ko mahbub ham-qayas kiya

Farq nikla bahut jo baas kiya

Dil ne ham ko misal-e-aaina

Ek aalam ka ru-shanas kiya

Kuchh nahin sujhta hamen us bin

Shauq ne ham ko be-havas kiya

Ishq mei ham hue na divane

Qais ki aabru ka paas kiya

Daur se charkh ke nikal na sake

Zof ne ham ko murtas kiya

Subh tak shama sar ko dhunti rahi

Kya patinge ne iltimas kiya

Tujh se kya kya tavaqqoen thiin hamen

So tere zulm ne niras kiya

Aise vahshi kahan hain ai khuban

'Meer' ko tum abas udaas kiya

GILA NAHIN HAI HAMEN APNI JAN-GUDAZI KA

Gila nahin hai hamen apni jan-gudazi ka

Jigar pe zakhm hai us ki zaban-darazi ka

Samand-e-naz ne us ke jahan kiya pamal

Vahi hai ab bhi use shauq tark taazi ka

Sitam hain qahr hain launde sharab-khane ke

Utaar lete hain amama har namazi ka

Ulat-palat meri ah-e-sahar ki kya hai kam

Agar khayal tumhen hove neza-bazi ka

Batao ham se koi aan tum se kya bigdi

Nahin hai tum ko saliqa zamana-sazi ka

Khuda ko kaam to saunpe hain main ne sab lekin

Rahe hai khauf mujhe vaan ki be-niyazi ka

Chalo ho rah-e-muafiq kahe mukhalif ke

Tariq chhod diya tum ne dil-navazi ke

Kaso ki baat ne aage mere na paaya rang

Dilon mei naqsh hai meri sukhan-tarazi ka

Basan-e-khak ho pamal rah-e-khalq ai 'Meer'

Rakhe hai dil mei agar qasd sarfarazi ka

KAB TAK TU IMTIHAN MEI MUJH SE JUDA RAHEGA

Kab tak tu imtihan mei mujh se juda rahega

Jiita huun to tujhi mei ye dil laga rahega

Yaan hijr aur ham mei bigdi hai kab ki sohbat

Zakhm-e-dil-o-namak mei kab tak maza rahega

Tu barson mei mile hai yaan fikr ye rahe hai

Ji jaega hamara ik-dam do ya rahega

Mere na hone ka to hai iztirab yuun hi

Aaya hai ji labon par ab kya hai ja rahega

Ghafil na rahiyo hargiz nadan dagh-e-dil se

Bhadkega jab ye shoala tab ghar jala rahega

Marne pe apne mat ja salik talab mei us ki

Go sar ko kho rahega par us ko pa rahega

Umr-e-aziz saari dil hi ke gham mei guzri

Bimar ashiqi ye kis din bhala rahega

Didar ka to vaada mahshar mei dekh kar kar

Bimar gham mei tere tab tak to kya rahega

Kya hai jo uth gaya hai par basta-e-vafa hai

Qaid-e-hayat mei hai tu 'Meer' aa rahega

JUZ JURM-E-ISHQ KOI BHI SABI KIYA GUNAH

Juz jurm-e-ishq koi bhi sabit kiya gunah

Nahaq hamari jaan li achhe ho vaah vaah

Ab kaisa chaak chaak ho dil us ke hijr mei

Guththavan to lakht-e-dil se nikalti hai meri aah

Shaam shab-e-visal hui yaan ki is taraf

Hone laga tulua hi khurshid ru-siyah

Guzra main us suluk se dekha na kar mujhe

Barchhi se laag ja hai jigar mei teri nigah

Daman-o-jeb chaak kharabi-o-khastagi

Un se tere firaq mei ham ne kiya nibah

Betabiyon ko saunp na dena kahin mujhe

Ai sabr main ne aan ke li hai teri panah

Khuun-basta baare rahne lagi ab to ye mizha

Aansu ki buund jis se tapakti thi gaah gaah

Gul se shagufta daagh dikhata huun tere tiin

Gar muvafaqat kare hai tanik mujh se sal-o-mah

Gar mana mujh ko karte hain teri gali se log

Kyunkar na jauun mujh ko to marna hai khva-makhvah

Nahaq ulajh pada hai ye mujh se tariq-e-ishq

Jaata tha 'Meer' mei to chala apni raah raah

JUDA JO PAHLU SE VO DILBAR YAGANA HUA

Juda jo pahlu se vo dilbar yagana hua

Tapish ki yaan taiin dil ne ki dard shana hua

Jahan ko fitne se khali kabhu nahin paaya

Hamare vaqt mei to aafat zamana hua

Khalish nahin kaso khvahish ki raat se shayad

Sarishk-e-yas ke parde mei dil ravana hua

Ham apne dil ki chale dil hi mei liye yaan se

Hazar haif sar-e-harf us se va na hua

Khula nashe mei jo pagdi ka pech us ki 'Meer'

Samand-e-naz pe ek aur taziyana hua

JOSHISH-E-ASHQ SE HUUN AATH PAHR PAANI MEI

Joshish-e-ashq se huun aath pahr paani mei

Garche hote hain bahut khauf-o-khatar paani mei

Zabt-e-girya ne jalaya hai daruna saara

Dil achambha hai ki hai sokhta-tar paani mei

Ab-e-shamshir-e-qayamat hai burinda us ki

Ye gavarai nahin paate hain har paani mei

Tab-e-dariya jo ho ashufta to phir tufan hai

Aah balon ko paraganda na kar paani mei

Gharq ab-e-ashk se huun lek uda jaata huun

Juun samak go ki mere duube hain par paani mei

Mardum-e-dida-e-tar mardum-e-abi hain magar

Rahte hain roz o shab o sham-o-sahar paani mei

Haiat ankhon ki nahin vo rahi rote rote

Ab to girdab se aate hain nazar paani mei

Girya-e-shab se bahut aankh dare hai meri

Paanv rukte hi nahin bar-e-digar paani mei

Fart-e-girya se hua 'Meer' tabah apna jahaz

Takhta paare gae kya janun kidhar paani mei

JO YE DIL HAI TO KYA SAR-ANJAM HOGA

Jo ye dil hai to kya sar-anjam hoga

Ta-khak bhi khaak aram hoga

Mira-ji to ankhon mei aaya ye sunte

Ki didar bhi ek din aam hoga

Na hoga vo dekha jise kabk tu ne

Vo ik baagh ka sarv-andam hoga

Na nikla kar itna bhi be-parda ghar se

Bahut us mei zalim to badnam hoga

Hazaron ki yaan lag gaiin chhat se ankhen

Tu ai maah kis shab-e-lab-e-bam hoga

Vo kuchh janta hoga zulfon mei phasna

Jo koi asiir ta-dam hoga

Jigar chaki nakami duniya hai akhir

Nahin aae jo 'Meer' kuchh kaam hoga

JO TU HI SANAM HAM SE BE-ZAR HOGA

Jo tu hi sanam ham se be-zar hoga

To jiina hamen apna dushvar hoga

Gham-e-hijr rakkhega be-tab dil ko

Hamen kudhte kudhte kuchh azar hoga

Jo ifrat-e-ulfat hai aisa to ashiq

Koi din mei barson ka bimar hoga

Uchatti mulaqat kab tak rahegi

Kabhu to tah-e-dil se bhi yaar hoga

Tujhe dekh kar lag gaya dil na jaana

Ki us sang-dil se hamen pyaar hoga

Laga karne hijran sakhti se sakhti

Khuda jaane kya akhir-e-kar hoga

Yahi hoga kya hoga 'Meer' hi na honge

Jo tu hoga be-yar gham-khvar hoga

JO MAIN NA HUUN TO KARO TARK NAAZ KARNE KO

Jo main na huun to karo tark naaz karne ko

Koi to chahiye ji bhi niyaz karne ko

Na dekho ghuncha-e-nargis ki or khulte mei

Jo dekho us ki mizha nim-baz karne ko

Na soe niind bhar is tangna mei ta na muue

Ki aah ja na thi pa ke daraz karne ko

Jo be-dimaghi yahi hai to ban chuki apni

Dimagh chahiye har ik se saaz karne ko

Vo garm naaz ho to khalq par tarahhum kar

Pukare aap ajal ehtiraz karne ko

Jo aansu aaven to pi ja ki ta rahe parda

Bala hai chashm-e-tar ifsha-e-raz karne ko

Samand naaz se tere bahut hai arsa tang

Tanik to tark kar is tark taaz karne ko

Basan-e-zar hai mera jism-e-zar saara zard

Asar tamam hai dil ke gudaz karne ko

Hanuz ladke ho tum qadar meri kya jaano

Shuur chahiye hai imtiyaz karne ko

Agarche gul bhi numud us ke rang karta hai

Va-lek chahiye hai munh bhi naaz karne ko

Zyada had se thi tabut-e-'Meer' par kasrat

Hua na vaqt musaid namaz karne ko

JO KAHO TUM SO HAI BAJA SAHAB

Jo kaho tum so hai baja sahab

Ham bure hi sahi bhala sahab

Sada-zehni mei nukta-chin the tum

Ab to hain harf-ashna sahab

Na diya rahm tuk buton ke taiin

Kya kiya haae ye khuda sahab

Bandagi ek apni kya kam hai

Aur kuchh tum se kahiye kya sahab

Mehr-afza hai munh tumhara hi

Kuchh ghazab to nahin hua sahab

Khat ke phatne ka tum se kya shikva

Apne talea ka ye likha sahab

Phir gaiin ankhen tum na aan phire

Dekha tum ko bhi vah-va sahab

Shauq-e-rukh yad-e-lab gham-e-didar

Ji mei kya kya mere raha sahab

Bhuul jaana nahin ghulam ka khuub

Yaad khatir rahe mera sahab

Kin ne sun sher-e-'Meer' ye na kaha

Kahiyo phir haae kya kaha sahab

JO IS SHOR SE 'MEER' ROTA RAHEGA

Jo is shor se 'Meer' rota rahega

To ham-saya kaahe ko sota rahega

Main vo rone vaala jahan se chala hun

Jise abr har saal rota rahega

Mujhe kaam rone se aksar hai naseh

Tu kab tak mere munh ko dhota rahega

Bas ai girya ankhen teri kya nahin hain

Kahan tak jahan ko dubota rahega

Mere dil ne vo naala paida kiya hai

Jaras ke bhi jo hosh khota rahega

Tu yuun galiyan ghair ko shauq se de

Hamen kuchh kahega to hota rahega

Bas ai 'Meer' mizhgan se ponchh ansuon ko

Tu kab tak ye moti pirota rahega

JO DEKHO MERE SHER-E-TAR KI TARAF

Jo dekho mere sher-e-tar ki taraf

To maail na ho phir guhar ki taraf

Koi dad-e-dil aah kis se kare

Har ik hai so us fitna-gar ki taraf

Mohabbat ne shayad ki di dil ko aag

Dhuaan sa hai kuchh is nagar ki taraf

Lagin hain hazaron hi aankhen udhar

Ik ashob hai us ke ghar ki taraf

Bahut rang milta hai dekho kabhu

Hamari taraf se sahar ki taraf

Ba-khud kis ko us tab-e-rukhk ne rakha

Kare kaun shams-o-qamar ki taraf

Na samjha gaya abr kya dekh kar

Hua tha meri chashm-e-tar ki taraf

Tapakta hai palkon se khoon muttasil

Nahin dekhte ham jigar ki taraf

Munasib nahin hal-e-ashiq se sabr

Rakhe hai ye daaru zarar ki taraf

Kise manzil-e-dilkash-e-dahr mei

Nahin miil khatir safar ki taraf

Rag-e-jan kab aati hai ankhon mei 'Meer'

Gae hain mizaj us kamar ki taraf

JITE-JI KUCHA-E-DILDAR SE JAAYA NA GAYA

Jite-ji kucha-e-dildar se jaaya na gaya

Us ki divar ka sar se mere saaya na gaya

Kav-kave mizha-e-yar o dil-e-zar-o-nazar

Guth gae aise shitabi ki chhudaya na gaya

Vo to kal der talak dekhta idhar ko raha

Ham se hi hal-e-tabah apna dikhaya na gaya

Garm-rau rah-e-fana ka nahin ho sakta patang

Us se to shama-namat sar bhi kataya na gaya

Pas-e-namus-e-mohabbat tha ki farhad ke paas

Be-sutun samne se apne uthaya na gaya

Khaak tak kucha-e-dildar ki chhani ham ne

Justuju ki pe dil-e-gum-shuda paaya na gaya

Atish-e-tez judai mei yakayak us bin

Dil jala yuun ki tanik ji bhi jalaya na gaya

Mah ne aa samne shab yaad dilaya tha use

Phir vo ta subh mere ji se bhulaya na gaya

Zer-e-shamshir-e-sitam 'Meer' tadapna kaisa

Sar bhi taslim-e-mohabbat mei hilaya na gaya

Ji mei aata hai ki kuchh aur bhi mauzun kiije

Dard-e-dil ek ghazal mei to sunaya na gaya

JIS SAR KO GHURUR AAJ HAI YAAN TAJ-VARI KA

Jis sar ko ghurur aaj hai yaan taj-vari ka

Kal us pe yahin shor hai phir nauhagari ka

Sharminda tere rukh se hai rukhsar pari ka

Chalta nahin kuchh aage tere kabk-e-dari ka

Afaq ki manzil se gaya kaun salamat

Asbab luta raah mei yaan har safari ka

Zindan mei bhi shorish na gai apne junun ki

Ab sang mudava hai is ashufta-sari ka

Har zakhm-e-jigar davar-e-mahshar se hamara

Insaf-talab hai teri bedad-gari ka

Apni to jahan aankh ladi phir vahin dekho

Aaine ko lapka hai pareshan-nazari ka

Sad mausam-e-gul ham ko tah-e-bal hi guzre

Maqdur na dekha kabhu be-bal-o-pari ka

Is rang se jhamke hai palak par ki kahe tu

Tuk'de hai mera ashq aqiq-e-jigari ka

Kal sair kiya ham ne samundar ko bhi ja kar

Tha dast-e-nigar panja-e-mizhgan ki tari ka

Le saans bhi ahishta ki nazuk hai bahut kaam

Afaq ki is kargah-e-shishagari ka

Tuk 'Meer' jigar-e-sokhta ki jald khabar le

Kya yaar bharosa hai charagh-e-sahari ka

JIS JAGAH DAUR-E-JAM HOTA HAI

Jis jagah daur-e-jam hota hai

Vaan ye aajiz mudam hota hai

Ham to ik harf ke nahin mamnun

Kaisa khatt-o-payam hota hai

Tegh nakamon pe na har dam khinch

Ik karishme mei kaam hota hai

Puchh mat aah ashiqon ki maash

Roz unka bhi shaam hota hai

Zakhm bin gham bin aur ghussa bin

Apna khana haram hota hai

Shaikh ki si hi shakl hai shaitan

Jis pe shab ahtelam hota hai

Qatl ko main kaha to uth bola

Aaj kal subh-o-sham hota hai

Akhir aaunga naash par ab aah

Ki ye ashiq tamam hota hai

'Meer' sahab bhi us ke haan the par

Jaise koi ghulam hota hai

JINS-E-GIRAN KO TUJH SE JO LOG CHAHTE HAIN

Jins-e-giran ko tujh se jo log chahte hain

Ve rog apne ji ko nahaq basahate hain

Us mai-kade mei ham bhi muddat se hain va-lekin

Khamyaza khinchte hain har dam jamahate hain

Namus dosti se gardan bandhi hai apni

Jiite hain jab talak ham tab tak nibahte hain

Sahal is qadar nahin hai mushkil-pasandi meri

Jo mujh ko dekhte hain mujh ko sarahte hain

Ve din gae ki raten nalon se kat'te the

Be-dol 'Meer'-sahib ab kuchh karahte hain

JIN KE LIYE APNE TO YUUN JAAN NIKALTE HAIN

Jin ke liye apne to yuun jaan nikalte hain

Is raah mei ve jaise anjaan nikalte hain

Kya tir-e-sitam us ke siine mei bhi tuute the

JIs zakhm ko chirun huun paikan nikalte hain

Mat sahl hamen jaano phirta hai falak barson

Tab khaak ke parde se insan nikalte hain

Kis ka hai qimash aisa gudad bhare hain saare

Dekho na jo logon ke divan nikalte hain

Gah lohu tapakte hai gah lakht-e-dil ankhon se

Ya tukde jigar hi ke har aan nikalte hain

Kariye to gila kis se jaisi thi hamen khvahish

Ab vaise hi ye apne arman nikalte hain

So kaahe ko apni tu jogi ki si pheri hai

Barson mei kabhu idhar ham aan nikalte hain

Un aaina-ruyon ke kya 'Meer' bhi ashiq hain

Jab ghar se nikalte hain hairan nikalte hain

JIN JIN KO THA YE ISHQ KA AZAR MAR GAE

Jin jin ko tha ye ishq ka azar mar gae

Aksar hamare saath ke bimar mar gae

Hota nahin hai us lab-e-nau-khat pe koi sabz

Iisa o khizr kya sabhi yak-bar mar gae

Yuun kanon-kan gul ne na jaana chaman mei aah

Sar ko patak ke ham pas-e-divar mar gae

Sad karvan vafa hai koi puchhta nahin

Goya mata-e-dil ke kharidar mar gae

Majnun na dasht mei hai na farhad koh mei

Tha jin se lutf-e-zindagi ve yaar mar gae

Gar zindagi yahi hai jo karte hain ham asiir

To ve hi ji gae jo giraftar mar gae

Afsos ve shahid ki jo qatl-gah mei

Lagte hi us ke haath ki talvar mar gae

Tujh se do-char hone ki hasrat ke mubtila

Jab ji hue vabal to na-char mar gae

Ghabra na 'Meer' ishq mei us sahal-e-zist par

Jab bas chala na kuchh to mere yaar mar gae