Gul ko mahbub ham-qayas kiya
Farq nikla bahut jo baas kiya
Dil ne ham ko misal-e-aaina
Ek aalam ka ru-shanas kiya
Kuchh nahin sujhta hamen us bin
Shauq ne ham ko be-havas kiya
Ishq mei ham hue na divane
Qais ki aabru ka paas kiya
Daur se charkh ke nikal na sake
Zof ne ham ko murtas kiya
Subh tak shama sar ko dhunti rahi
Kya patinge ne iltimas kiya
Tujh se kya kya tavaqqoen thiin hamen
So tere zulm ne niras kiya
Aise vahshi kahan hain ai khuban
'Meer' ko tum abas udaas kiya
No comments
Post a Comment