FAQIRANA AAE SADA KAR CHALE

Faqirana aae sada kar chale

Ki myaan khush raho ham dua kar chale

Jo tujh bin ja jiine ko kahte the ham

So is ahd ko ab vafa kar chale

Shifa apni taqdir hi mei na thi

Ki maqdur tak to dava kar chale

Pade aise asbab payan-e-kar

Ki na-char yuun ji jala kar chale

Vo kya chiiz hai aah jis ke liye

Har ik chiiz se dil utha kar chale

Koi na-umidana karte nigah

So tum ham se munh bhi chhupa kar chale

Bahut aarzu thi gali ki teri

So yaan se lahu mei nahan kar chale

Dikhai diye yuun ki be-khud kiya

Hamen aap se bhi juda kar chale

Jabin sajda karte hi karte gai

Haq-e-bandagi ham ada kar chale

Parastish ki yaan tak ki ai but tujhe

Nazar mei sabhon ki khuda kar chale

Jhade phool jis rang gulbun se yuun

Chaman mei jahan ke ham aa kar chale

Na dekha gham-e-dostan shukr hai

Hamin daagh apna dikha kar chale

Gaii umr dar-band-e-fikr-e-ghazal

So is fan ko aisa bada kar chale

Kahen kya jo puchhe koi ham se 'Meer'

Jahan mei tum aae to kya kar chale