FALAK NE GAR KIYA RUKHSAT MUJHE SAIR-E-BAYABAN KO

Falak ne gar kiya rukhsat mujhe sair-e-bayaban ko

Nikala sar se mere jaae mu khar-e-mughilan ko

Vo zalim bhi to samjhe kah rakha hai ham ne yaran ko

Ki goristan se gaden juda ham ahl-e-hijran ko

Nahin ye bed-e-majnun gardish-e-gardun-e-gardan ne

Banaya hai shajar kya janiye kis mu pareshan ko

Hue the jaise mar jaate par ab to sakht hasrat hai

Kiya dushvar nadani se ham ne kar-e-asan ko

Kahin nasl aadmi ki uth na jaave is zamane mei

Ki moti ab-e-haivan jante hain ab-e-insan ko

Tujhe gir chashm-e-ibrat hai to andhi aur bagule se

Tamasha kar ghubar-afshani khak-e-azizan ko

Libas-e-mard-e-maidan jauhar-e-zati kifayat hai

Nahin piroe poshish maarke mei tegh-e-uryan ko

Hava-e-abr mei garmi nahin ho tu na ho saaqi

Dam afsurda kar de munjamid rashhat-e-baran ko

Jalen hain kab ki mizhgan ansuon ki garm-joshi se

Us ab-e-chashm ki joshish ne atish di nistan ko

Vo kafir ishq ka hai dil ki meri bhi rag-e-jan tak

Sada zunnar hi tasbih hai us na-musalman ko

Ghurur-e-naz se ankhen na kholin is jafa-ju ne

Mila paanv tale jab tak na chashm-e-sad-ghazalan ko

Na si chashm-e-tama khvan-e-falak par kham-dasti se

Ki jam-e-khun de hai har sahar ye apne mehman ko

Zi-bas sirf junun mere hua aahan ajab mat kar

Na ho gar halqa-e-dar khana-e-zanjir-sazan ko

Bane na-vaqif-e-shadi agar ham bazm-e-ishrat mei

Dahan-e-zakhm-e-dil samjhe jo dekha ru-e-khandan ko

Nahin reg-e-ravan majnun ke dil ki be-qarari ne

Kiya hai muztarib har zarra-e-gard-e-bayaban ko

Kisi ke vastte rusva-e-alam ho pe ji mei rakh

Ki maara jaae jo zahir kare us raz-e-pinhan ko

Giri padti hai bijli hi tabhi se khirman gul par

Tak ik hans mere rone par ki dekhe tere dandan ko

Ghurur-e-naz-e-qatil ko liye ja hai koi puchhe

Chala to saunp kar kis ke taiin us said-e-be-jan ko

Vo tukhm-e-sokhta the ham ki sar-sabzi na ki hasil

Milaya khaak mei daana namat hasrat se dahqan ko

Hua huun ghuncha-e-pazhmurda akhir fasl ka tujh bin

Na de barbad hasrat kusta-e-sar-dar-gareban ko

Gham-o-andoh-o-be-tabi alam be-taqati hirman

Kahun ai ham-nashin ta-chand gham-ha-e-firavan ko

Gul-o-sarv-o-saman gir jaaenge mat sair-e-gulshan kar

Mila mat khaak mei un baagh ke raana javanan ko

Bahut roe jo ham ye astin rakh munh pe ai bijli

Na chashm-e-kam se dekh us yadgar-e-chashm-e-giryan ko

Mizaj us vaqt hai ik matla-e-taza pe kuchh maail

Ki be-fikr sukhan banti nahin hargiz sukhan-dan ko