Sharah-e-bedardi-e-halat na hone paai
Ab ke bhi dil ki mudarat na hone paai
Phir vahi vaada jo iqrar na banne paaya
Phir vahi baat jo isbat na hone paai
Phir vo parvane jinhen izn-e-shahadat na mila
Phir vo shamen ki jinhen raat na hone paai
Phir vahi jan-ba-labi lazzat-e-mai se pahle
Phir vo mahfil jo kharabat na hone paai
Phir dam-e-did rahe chashm o nazar did-talab
Phir shab-e-vasl mulaqat na hone paai
Phir vahan bab-e-asar janiye kab band hua
Phir yahan khatm munajat na hone paai
'Faiz' sar par jo har ik roz qayamat gurzi
Ek bhi roz mukafat na hone paai
No comments
Post a Comment