Sab qatl ho ke tere muqabil se aae hain
Ham log surkh-ru hain ki manzil se aae hain
Sham-e-nazar khayal ke anjum jigar ke daagh
Jitne charagh hain teri mahfil se aae hain
Uth kar to aa gae hain teri bazm se magar
Kuchh dil hi janta hai ki kis dil se aae hain
Har ik qadam ajal tha har ik gaam zindagi
Ham ghuum phir ke kucha-e-qatil se aae hain
Bad-e-khizan ka shukr karo 'Faiz' jis ke haath
Naame kisi bahar-e-shimail se aae hain
No comments
Post a Comment