PHIR KUCHH IK DIL KO BE-QARARI HAI

Phir kuchh ik dil ko be-qarari hai

Siina juya-e-zakhm-e-kari hai

Phir jigar khodne laga nakhun

Amad-e-fasl-e-lala-kari hai

Qibala-e-maqsad-e-nigah-e-niyaz

Phir vahi parda-e-amari hai

Chashm dallal-e-jins-e-rusvai

Dil kharidar-e-zauq-e-khvari hai

Vahi sad-rang nala-farsai

Vahi sad-gona ashk-bari hai

Dil hava-e-khiram-e-naz se phir

Mahsharistan-e-be-qarari hai

Jalva phir arz-e-naz karta hai

Roz bazar-e-jan-sipari hai

Phir usi bevafa pe marte hain

Phir vahi zindagi hamari hai

Phir khula hai dar-e-adalat-e-naz

Garm-bazar-e-faujdari hai

Ho raha hai jahan mei andher

Zulf ki phir sirishta-dari hai

Phir diya para-e-jigar ne saval

Ek fariyad o ah-o-zari hai

Phir huwe hain gavah-e-ishq talab

Ashk-bari ka hukm-jari hai

Dil o mizhgan ka jo muqaddama tha

Aaj phir us ki ru-bakari hai

Be-khudi be-sabab nahin 'Ghalib'

Kuchh to hai jis ki parda-dari hai