Kya tang ham sitam-zadagan ka jahan hai
Jis mei ki ek baiza-e-mor asman hai
Hai kaenat ko harkat tere zauq se
Partav se aftab ke zarre mei jaan hai
Halanki hai ye sili-e-khara se laala rang
Ghafil ko mere shishe pe mai ka guman hai
Ki us ne garm sina-e-ahl-e-havas mei ja
Aave na kyun pasand ki thanda makan hai
Kya khub tum ne ghair ko bosa nahi diya
Bas chup raho hamare bhi muh mei zaban hai
Baitha hai jo ki saya-e-deewar-e-yar mei
Farman-rava-e-kishvar-e-hindustan hai
Hasti ka eitbaar bhi gham ne mita diya
Kis se kahun ki daagh jigar ka nishan hai
Hai baare etimad-e-vafa-dari is qadar
'Ghalib' ham is mei khush hain ki na-mehrban hai
Dilli ke rahne vaalo 'Asad' ko satao mat
Be-chara chand roz ka yaan mehman hai
No comments
Post a Comment