Kis se izhar-e-mudda kiije
Aap milte nahin hain kya kiije
Ho na paaya ye faisla ab tak
Aap kiije to kya kiya kiije
Aap the jis ke chara-gar vo javan
Sakht bimar hai dua kiije
Ek hi fan to ham ne sikha hai
Jis se miliye oose khafa kiije
Hai taqaza meri tabiat ka
Har kisi ko charagh-pa kiije
Hai to baare ye alam-e-asbab
Be-sabab chikhne laga kiije
Aaj ham kya gila karen us se
Gila-e-tangi-e-qaba kiije
Nutq haivan par garan hai abhi
Guftugu kam se kam kiya kiije
Hazrat-e-zulf-e-ghaliya-afshan
Naam apna saba saba kiije
Zindagi ka ajab moamla hai
Ek lamhe mei faisla kiije
Mujh ko aadat hai ruuth jaane ki
Aap mujh ko mana liya kiije
Milte rahiye isi tapak ke saath
Bevafai ki intiha kiije
Kohkan ko hai khud-kushi khvahish
Shah-bano se iltija kiije
Mujh se kahti thiin vo sharab ankhen
Aap vo zahar mat piya kiije
Rang har rang mei hai dad-talab
Khoon thukan to vah-va kiije
No comments
Post a Comment