Kis harf pe tu ne gosha-e-lab ai jan-e-jahan ghammaz kiya
Elan-e-junun dil valon ne ab ke ba-hazar-andaz kiya
Sau paikan the paivast-e-gulu jab chhedi shauq ki lai ham ne
So tiir tarazu the dil mei jab ham ne raqs aghaz kiya
Be-hirs-o-hava be-khauf-o-khatar is haath pe sar is kaf pe jigar
Yuun ku-e-sanam mei vaqt-e-safar nazzara-e-bam-e-naz kiya
Jis khaak mei mil kar khaak huwe vo surma-e-chashm-e-khalq bani
Jis khaar pe ham ne khoon chhidka ham-rang-e-gul-e-tannaz kiya
Lo vasl ki saath aa pahunchi phir hukm-e-huzuri par ham ne
Ankhon ke dariche band kiye aur siine ka dar baaz kiya
No comments
Post a Comment