Khvab ke rang dil-o-jan mei sajae bhi gae
Phir vahi rang ba-sad taur jalae bhi gae
Unhi shahron ko shitabi se lapeta bhi gaya
Jo ajab shauq-e-farakhi se bichhae bhi gae
Bazm shokhi ka kisi ki kahen kya hal-e-jahan
Dil jalae bhi gae aur bujhae bhi gae
Pusht mitti se lagi jis mei hamari logo
Oosi danggal mei hamen daav sikhae bhi gae
Yad-e-ayyam ki ik mahfil-e-jan thi ki jahan
Haath khinche bhi gae aur milae bhi gae
Ham ki jis shahr mei the sog-nashin-e-ahval
Roz is shahr mei ham dhuum machae bhi gae
Yaad mat rakhiyo ye rudad hamari hargiz
Ham the vo taj-mahal 'Jaun' jo dhaae bhi gae
No comments
Post a Comment