Juz guman aur tha hi kya mera
Faqat ik mera naam tha mera
Nikhat-e-pairahan se us gul ki
Silsila be-saba raha mera
Mujh ko khvahish hi dhundne ki na thi
Mujh mei khoya raha khuda mera
Thuuk de khoon jaan le vo agar
Alam-e-tark-e-mudda mera
Jab tujhe meri chaah thi janan
Bas vahi vaqt tha kada mera
Koi mujh tak pahunch nahi pata
Itna asan hai pata mera
Aa chuka pesh vo muravvat se
Ab chalun kaam ho chuka mera
Aaj main khud se ho gaya mayus
Aaj ik yaar mar gaya mera
No comments
Post a Comment