CHALO BAD-E-BAHARI JA RAHI HAI

Chalo bad-e-bahari ja rahi hai

Piya-ji ki savari ja rahi hai

Shumal-e-javedan-e-sabz-e-jan se

Tamanna ki amari ja rahi hai

Fughan ai dushman-e-dar-e-dil-o-jan

Meri halat sudhari ja rahi hai

Jo in rozon mera gham hai vo ye hai

Ki gham se burdbari ja rahi hai

Hai siine mei ajab ik hashr barpa

Ki dil se be-qarari ja rahi hai

Main paiham haar kar ye sochta hun

Vo kya shai hai jo haari ja rahi hai

Dil us ke ru-ba-ru hai aur gum-sum

Koi arzi guzari ja rahi hai

Vo sayyad bachcha ho aur shaikh ke saath

Miyan izzat hamari ja rahi hai

Hai barpa har gali mei shor-e-naghma

Meri fariyad maari ja rahi hai

Vo yaad ab ho rahi hai dil se rukhsat

Miyan pyaron ki pyari ja rahi hai

Daregha teri nazdiki miyan-ja

Teri duuri pe vaari ja rahi hai

Bohot bad-hal hain basti tere log

To phir tu kyun sanvari ja rahi hai

Teri marham-nigahi ai masiha

Kharash-e-dil pe vaari rahi hai

Kharabe mei ajab tha shor barpa

Dilon es intizari ja rahi hai