Daulat-e-dahr sab lutai hai
Main ne dil ki kamai khaai hai
Ek lamhe ko tiir karne mei
Main ne ik zindagi ganvai hai
Vo jo sarmaya-e-dil-o-jan thi
Ab vahi aarzu parai hai
Tu hai akhir kahan ki aaj mujhe
Be-tarah apni yaad aai hai
Jan-e-jan tujh se du-badu ho kar
Main ne khud se shikast khaai hai
Ishq mere guman mei yaran
Dil ki ik zor azmai hai
Us mei rah kar bhi main nahin us mei
Janiye dil mei kya samai hai
Mauj-e-bad-e-saba pe ho ke savar
Vo shamim-e-khayal aai hai
Sharm kar tu ki dasht-e-halat mei
Teri laila ne khaak udaai hai
Bik nahin pa raha tha so main ne
Apni qimat bohot badhai hai
Vo jo tha 'Jaun' vo kahin bhi na tha
Husn ik khvab ki judai hai
No comments
Post a Comment