Gar na andoh-e-shab-e-furqat bayan ho jaega
Be-takalluf dagh-e-mah mohr-e-dahan ho jaega
Zohra gar aisa hi sham-e-hijr mei hota hai aab
Partav-e-mahtab sail-e-khanuman ho jaega
Le to lun sote mei us ke paanv ka bosa magar
Aisi baton se wo kafir bad-guman ho jaega
Dil ko ham sarf-e-vafa samjhe the kya maalum tha
Yaani ye pahle hi nazr-e-imtihan ho jaega
Sab ke dil mei hai jagah teri jo tu raazi hua
Mujh pe goya ek zaman mehrbaan ho jaega
Gar nigah-e-garm farmati rahi talim-e-zabt
Shoala khas mei jaese khoon rag mei nihan ho jaega
Baagh mei mujh k ona le ja warna mere haal par
har gul-e-tar ek chashm-e-khoon-fishan ho jaega
Vaae gar mera tera insaaf mahshar mei na ho
Ab talak to ye tavaqqo.a hai ki vaan ho jaega
Faeda kya soch akhir tu bhi daana hai 'Asad'
Dosti nadan ki hai ji ka ziyaan ho jaega
