Dil laga kar lag gaya un ko bhi tanha baithna
Baare apni bekasi ki ham ne paai daad yahan
Hain zawal-amada ajza afrinash ke tamaam
Mahr-e-gardun hai charagh-e-rahguzar-e-bad yahan
Hai tarahhum-afrin araish-e-be-dad yahan
Ashk-e-chashm-e-dam hai har dana-e-sayyad yahan
Hai gudaz-e-mom andaz-e-chakidan-ha-e-khoon
Nish-e-zambur-e-asal hai nashtar-e-fassad yahan
Na-gavaara hai hamen ehsaan-e-sahab-daulatan
Hai zar-e-gul bhi nazar mei jauhar-e-faulaad yahan
Jumbish-e-dil se huwe hain uqda-ha-e-kar va
Kam-tarin mazdur-e-sangin-dast hai farhad yahan
Qatra-ha-e-khoon-e-bismil zeb-e-daman hain 'Asad'
Hai tamasha kardani gul-chini-e-jallad yahan
