Ajab ik taur hai jo ham sitam ijaad rakhen
Ki na us shakhs ko bhulen na oose yaad rakhen
Ahd is kucha-e-dil se hai so us kuche mei
Hai koi apni jagah ham jise barbad rakhen
Kya kahen kitne hi nukte hain jo barte na gae
Khush-badan ishq karen aur hamen ustad rakhen
Be-sutun ik navahi mei hai shahr-e-dil ki
Tesha inaam karen aur koi farhad rakhen
Ashiyana koi apna nahin par shauq ye hai
Ik qafas laaen kahin se koi sayyad rakhen
Ham ko anfas ki apne hai imarat karni
Is imarat ki labon par tere buniyaad rakhen
