Aaina kyun na dun ki tamasha kahen jise
Aesa kahan se laaun ki tujh sa kahen jise
Hasrat ne la rakha teri bazm-e-khayal mei
Gul-dasta-e-nigaah suvaida kahen jise
Phunka hai kis ne gosh-e-mohabbat mei ai khuda
Afsun-e-intezaar tamanna kahen jise
Sar par hujum-e-dard-e-gharibi se daaliye
Wo ek musht-e-khaak ki sahra kahen jise
Hain chashm-e-tar mei hasrat-e-didaar se nihaan
Shauq-e-inaan gusekhta dariya kahen jise
Darkaar hai shaguftan-e-gul-ha-e-aish ko
Subh-e-bahar pumba-e-meena kahen jise
'Ghalib' bura na maan jo vaaiz bura kahe
Aisa bhi koi hai ki sab achcha kahen jise
Ya rab hamen to khwaab mei bhi mat dikhaaiyo
Ye mahshar-e-khayal ki duniya kahen jise
