NAAM HI KYA NISHAN HI KYA KHVAB-O-KHAYAL HO GAE

Naam hi kya nishan hi kya khvab-o-khayal ho gae

Teri misal de ke ham teri misal ho gae

Saya-e-zat se bhi ram aks-e-sifat se bhi ram

Dasht-e-ghazal mei aa ke dekh ham to ghazal ho gae

Kahte hi nashsha-ha-e-zauq kitne hi jazba-ha-e-shauq

Rasm-e-tapak-e-yar se ru-ba-zaval ho gae

Ishq hai apna paedar teri vafa hai ustuvar

Ham to halak-e-varzish-e-farz-e-muhal ho gae

Jada-e-shauq mei pada qaht-e-ghubar-e-karvan

Vaan ke shajar to sar-ba-sar dast-e-saval ho gae

Sakht zamin-parast the ahd-e-vafa ke pasdar

Ud ke bulandiyon mei ham gard-e-malal ho gae

Qurb-e-jamal aur ham aish-e-visal aur ham

Haan ye hua ki sakin-e-shahr-e-jamal ho gae

Ham-nafasan-e-vaza-dar mustamian-e-burd-bar

Ham to tumhare vaste ek vabal ho gae

Kaun so qafila hai ye jis ke jaras ka hai ye shor

Main to nidhal ho gaya ham to nidhal ho gae

Khar-ba-khar gul-ba-gul fasl-e-bahar aa gai

Fasl-e-bahar aa gai zakhm bahal ho gae

Shor utha magar tujhe lazzat-e-gosh to mili

Khoon baha magar tere haath to laal ho gae

'Jaun' karoge kab talak apna misaliya talash

Ab kai hijr ho chuke ab kai saal ho gae