Khoob hai shauq ka ye pahlu bhi
Main bhi barbad ho gaya tu bhi
Husn-e-maghmum tamkanat mei teri
Farq aaya na yak-sar-e-mu bhi
Ye na socha tha zer-e-saya-e-zulf
Ki bichhad jaegi ye khushbu bhi
Husn kahta tha chhedne vaale
Chhedna hi to bas nahin chhu bhi
Haae vo us ka mauj-khez badan
Main to pyasa raha lab-e-ju bhi
Yaad aate hain moajize apne
Aur us ke badan ka jaadu bhi
Yasmin us ki khaas mahram-e-raz
Yaad aaya karegi ab tu bhi
Yaad se us ki hai mera parhez
Ai saba ab na aaiyo tu bhi
Hain yahi 'Jaun Elia' jo kabhi
Sakht maghrur bhi the bad-khu bhi
No comments
Post a Comment