Kab us ka visal chahiye tha
Bas ek khayal chahiye tha
Kab dil ko javab se gharaz thi
Honton ko saval chahiye tha
Shauq ek nafas tha aur vafa ko
Pa-e-mah-o-sal chahiye tha
Ik chehra-e-sada tha jo ham ko
Be-misl-o-misal chahiye tha
Ik karb mei zat-o-zindagi hain
Mumkin ko muhal chahiye tha
Main kya huun bas ik malal-e-mazi
Is shakhs ko haal chahiye tha
Ham tum jo bichhad gae hain ham ko
Kuchh din to malal chahiye tha
Vo jism jamal tha sarapa
Aur mujh ko jamal chahiye tha
Vo shokh ramida mujh ko apni
Banhon mei nidhal chahiye tha
Tha vo jo kamal-e-shauq-e-vaslat
Khvahish ko zaval chahiye tha
Jo lamha-ba-lamha mil raha hai
Vo sal-ba-sal chahiye tha
No comments
Post a Comment