JUZ QAIS AUR KOI NA AAYA BA-RU-E-KAR

Juz qais aur koi na aaya ba-ru-e-kar

Sahra magar ba-tangi-e-chashm-e-hasud tha

Ashuftagi ne naqsh-e-suvaida kiya durust

Zahir huwa ki daagh ka sarmaya duud tha

Tha khwab mei khayal ko tujh se muamla

Jab aankh khul gayi na ziyan tha na suud tha

Leta hun maktab-e-gham-e-dil mei sabaq hanuz

Lekin yahi ki raft gaya aur buud tha

Dhanpa kafan ne dagh-e-uyub-e-barahnagi

Maen varna har libas mei nang-e-vajud tha

Teshe baghair mar na saka kohkan 'Asad'

Sargashta-e-khumar-e-rusum-o-quyud tha

Aalam jahan ba-arz-e-bisat-e-vajud tha

Juun subh chak-e-jeb mujh tar-o-pud tha

Bazi-khur-e-fareb hai ahl-e-nazar ka zauq

Hangama garm-e-hairat-e-bud-o-nabud tha

Aalam tilism-e-shahr-e-khamoshi hai sar-basar

Ya main gharib-e-kishvar-e-guft-o-shunud tha

Tangi rafiq-e-rah thi adam ya vajud tha

Mera safar ba-tala-e-chashm-e-hasud tha

Tu yad-jahan qamash-e-havas jama kar ki maen

Hairat-mata-e-alam-e-nuqsan-o-sud tha

Gardish-muhit-e-zulm raha jis qadar falak

Maen paemal-e-ghamza-e-chashm-e-kabud tha

Puchha tha garche yaar ne ahval-e-dil magar

Kis ko dimagh-e-minnat-e-guft-o-shunud tha

Khur shabnam-ashna na huwa varna maen 'Asad'

Sar-ta-qadam guzarish-e-zauq-e-sujud tha