Jaao qarar-e-be-dilan sham-ba-khair shab-ba-khair
Sahn hua dhuan dhuan sham-ba-khair shab-ba-khair
Sham-e-visal hai qarib subh-e-kamal hai qarib
Phir na rahenge sargiran sham-ba-khair shab-ba-khair
Vajd karegi zindagi jism-ba-jism jan-ba-jan
Jism-ba-jism jan-ba-jan sham-ba-khair shab-ba-khair
Ai mere shauq ki umang mere shabab ki tarang
Tujh pe shafaq ka saeban sham-ba-khair shab-ba-khair
Tu meri shaeri mei hai rang-e-taraz o gul-fishan
Teri bahar be-khizan sham-ba-khair shab-ba-khair
Tere khayal khvab khvab khalvat-e-jan ki ab-o-tab
Jism-e-jamil-e-o-naujavan sham-ba-khair shab-ba-khair
Hai mera nam-e-arjumand tera hisar-e-sar-buland
Bano-e-shahr-e-jism-o-jan sham-ba-khair shab-ba-khair
Diid se jan-e-did tak dil se rukh-e-umid tak
Koi nahin hai darmiyan sham-ba-khair shab-ba-khair
Ho gai der jaao tum mujh ko gale lagao tum
Tu meri jaan hai meri jaan sham-ba-khair shab-ba-khair
Sham-ba-khair shab-ba-khair mauj-e-shamim-e-pairahan
Teri mahak rahegi yaan sham-ba-khair shab-ba-khair
No comments
Post a Comment