Hamare zakhm-e-tamanna purane ho gae hain
Ki us gali mei gae ab zamane ho gae hain
Tum apne chahne valon ki baat mat suniyo
Tumhare chahne vaale divane ho gae hain
Vo zulf dhuup mei furqat ki aai hai jab yaad
To badal aae hain aur shamiyane ho gae hain
Jo apne taur se ham ne kabhi guzare the
Vo subh o shaam to jaise fasane ho gae hain
Ajab mahak thi mere gul tere shabistan the
So bulbulon ke vahan ashiyane ho gae hain
Hamare baad jo aaen unhe mubarak ho
Jahan the kunj vahan kar-khane ho gae hain
No comments
Post a Comment