Ghar se ham ghar talak gae honge
Apne hi aap tak gae honge
Ham jo ab aadmi hain pahle kabhi
Jaam honge chhalak gae honge
Vo bhi ab ham se thak gaya hoga
Ham bhi ab us se thak gae honge
Shab jo ham se hua muaaf karo
Nahin pi thi bahak gae honge
Kitne hi log hirs-e-shohrat mei
Daar par khud latak gae honge
Shukr hai is nigah-e-kam ka miyan
Pahle hi ham khatak gae honge
Ham to apni talash mei aksar
Az sama-ta-samak gae honge
Us ka lashkar jahan-tahan yaani
Ham bhi bas be-kumak gae honge
'Jaun' allah aur ye aalam
Biich mei ham atak gae honge
No comments
Post a Comment