Hazaaron khwahishen aisi ki har khwahish pe dam nikle
Bohot nikle mere armaan lekin phir bhi kam nikle
Dare kyun mera qaatil kya rahega uski gardan par
Wo khoon jo chashm-e-tar se umr bhar yun dam-ba-dam nikle
Nikalna khuld se Aadam ka sunte aaye hain lekin
Bohot be-aabru ho kar tere kuche se ham nikle
Bharam khul jaye zaalim tere qaamat ki daraazi ka
Agar is turra-e-pur-pech-o-kham ka pech-o-kham nikle
Magar likhvae koi usko khat to hamse likhvae
Hui sukh aur ghar se kaan par rakh kar qalam nikle
Hui is daur mei mansoob mujhse baadaa-aashami
Phir aaya vo zamana jo jahan mei jam-e-jam nikle
Hui jinse tavaqqo khastagi ki daad paane ki
Wo hamse bhi zyada khasta-e-tegh-e-sitam nikle
Mohabbat mei nahi hai farq jeene aur marne ka
Usi ko dekh kar jeete hain jis qaafir pe dam nikle
Zara kar jor seene par ki tir-e-pursitam nikle
Jo wo nikle to dil nikle, jo dil nikle to dam nikle
Khuda ke vaaste parda na kaabe se utha zaalim
Kahin aesa na ho yahan bhi wahi qaafir sanam nikle
Kahan maekhane ka darvaza 'Ghalib' aur kahan vaiz
Par itna jaante hain kal vo jaata tha ke ham nikle
