NA TO DIL KA NA JAAN KA DAFTAR HAI

Na to dil ka na jaan ka daftar hai

Zindagi ik ziyan ka daftar hai

Padh raha hun main kaghazat-e-vajud

Aur nahin aur haan ka daftar hai

Koi soche to soz-e-karb-e-jan

Saara daftar guman ka daftar hai

Ham mei se koi to kare israr

Ki zamin asman ka daftar hai

Hijr taatil-e-jism-o-jan hai miyan

Vasl jism aur jaan ka daftar hai

Vo jo daftar hai asmani-tar

Vo miyan ji yahan ka daftar hai

Hai jo bud-o-nabud ka daftar

Akhirash ye kahan ka daftar hai

Jo haqiqat hai dam-ba-dam ki yaad

Vo to ik dastan ka daftar hai

Ho raha hai guzishtagan ka hisab

Aur aaindagan ka daftar hai