Jo guzar dushman hai us ka rahguzar rakkha hai naam
Zaat se apni na hilne ka safar rakkha hai naam
Pad gaya hai ik bhavar us ko samajh baithe hain ghar
Lahr uthi hai lahr ka divar-o-dar rakkha hai naam
Naam jis ka bhi nikal jaae usi par hai madar
Us ka hona ya na hona kya, magar rakkha hai naam
Ham yahan khud aae laaya nahin koi hamen
Aur khuda ka ham ne apne naam par rakkha hai naam
Chak-e-chaki dekh kar pairahan-e-pahnai ki
Main ne apne har nafs ka bakhiya-gar rakkha hai naam
Mera siina koi chhalni bhi agar kar de to kya
Main ne to ab apne siine ka sipar rakkha hai naam
Din hue par tu kahin hona kisi bhi shakl mei
Jaag kar khvabon ne tera raat bhar rakkha hai naam
No comments
Post a Comment